الاثنين، 18 يناير، 2010

حاجات لازم اقولها .. يمكن اعرف انام

يمكن كان فيه ناس شايفين إنى مش مهتم .. و يمكن كان فيه ناس شايفين اننا ماعملناش اللى المفروض يتعمل
ليهم حق فعلا فى اننا ما عملناش اللى المفروض يتعمل
لكن محدش كان متوقع ان الأمن يكون بالغباء و التخلف ده
كان كل الناس متوقعين ان الاجهزه السياديه بالدوله(او هكذا يطلقون عليها) و أمن الدوله هايخرجوا الناس اخر النهار بعد ما مفتى الحزب الوطنى يمشى بعد اداء مسرحيته الهزليه المكرره

علشان كده يمكن الناس افتكروا انى مش مهتم
لأنى كنت بقول انهم هايخرجوا اكيد اخر النهار
ويمكن لإن العربيه عملتها كالعاده و بهدلتنى و فرجت عليا الشارع وانا رايح الوقفه واخرتنى عن المعاد

ما علينا
بس انا بجد حزين و مش عارف انام رغم انى معروف عنى النوم السريع فى اى وقت
نفس الاحساس بالكأبه و الحزن يوم ما تم اعتقال اخواتى يوم 6 ابريل 2008
كنت يومها حاسس بالذنب قوى خصوصا تجاه اسراء و أحمد بدوى
اسراء لانى ورطتها و كانت قبل 6 ابريل لما بتقولى انا قلقانه يا احمد كنت بقولها ماتخافيش محدش هايعتقلك لأنك بنت .. أنا اللى هاتمسك مش انتى
وفى الاخر هى اللى اتمسكت مش انا

وبدوى لأنه قبل 6 ابريل بأيام كان لسه متعين فى وظيفه جديده فى شركه كبيره و كان بيقوللى مش عايز اخسر وظيفتى واتحبس
ولما لقيته فجأه تحمس للدعوه للاضراب فرحت جدا و قعدت اشجعه و اطمنه

يوم ما اتمسكوا يوم 6 ابريل كنت فى قمة الحزن
حاسس بالضياع
نفس الاحساس اللى انا فيه دلوقتى

حسيت وقتها ان اسراء غاليه عندى جدا
وبدوى كأنه اخويا و كنت بحب اخلاصه للقضيه من ايام 2005
وكنت حاسس بالذنب يوم ما اعتقل

وكنت حاسس بحزن رهيب
ودلوقتى حاسس نفس الاحساس

كنت بقول انا كان لازم اكون معاهم جوه
يمكن كان اللى مصبرنى فى 2008 انى كنت بره عارف اكمل و ان الشباب اللى اتجمعوا على جروب الاضراب ما اتفرقوش و قدرت اعمل مشروع تكوين حركه شبابيه مستقله بمساعدة الشباب اللى انضم لجروب الاضراب
الحلم اللى كان عندى من سنين

لكن حاسس ان المره دى اصعب كمان
فيها ناس تانيه معتقلين و غاليين عليا


زى باسم فتحى
نصى التانى
اللى مهما اختلفنا .. بحبه جدا و هايفضل على طول ... نصى التانى
وهايفضل اغلى صديق ليا مهما حصل


المره دى فيها وائل عباس
اللى لا يمكن انسى دوره فى صناعة حركة 6 ابريل اعلاميا و مساندته ليا و للحركه من اول يوم

باسم سمير
المخلص لمبادئه و افكاره وابو دم خفيف و كلامه مايتشبعش منه

ناصر
المحترم و الجدع و اللى تفكيره منظم وجاد جدا رغم انه ساعات بيعقد الدنيا شويه

مصطفى النجار
وده بالذات اسطوره فى الاحترام و الادب و مثال جميل للاسلامى المنفتح على الاخرين و المحترم لكل المختلفين معاه

سلمى
دى بجد بنت جميله جدا
صغنونه و هاديه لكن بتلاقيها جدعه و فى كل مكان و نشطه و بتخدم فى اى قضيه بكل طاقتها

شاهيناز
اسكندرانيه جدعه بجد
قابلتها مرات قليله
لكن فى كل مره بلاقيها بنت جدعه و كانت من اوائل الناس اللى حركوا الدنيا فى مصر بتدويناتهم و كتابتهم

كل الناس المعتقلين

نفسى كلامى يوصلهم

نفسى يعرفوا انى بحبهم كلهم
وانى كان نفسى ابقى معاهم
وانى هابذل كل جهدى و انا بره علشان اخفف عنهم و اقصر مدة وجودهم جوا

نفسى اى حد منهم اختلفت معاه قبل كده يسامحنى و ينسى
على الاقل لغاية ما يخرج و نبقى نكمل خناقاتنا بعدين

هناك تعليق واحد:

mohammed elmasry يقول...

6 ابريل هى المعنى الحقيقى للنضال و الكفاح و على عكس ما يقال عن شباب الحركه انتم اساس الثورة مش حد تانى
و شكرااااا