الأربعاء، 20 يناير 2010

تدوينه مقرفه فى يوم مقرف وسط ايام كتير مقرفه ... يلعن ابو كده

التدوينه دى مش من ضمن اسهال التدوينات اللى شغال اليومين دول
دى مجرد سرد لملاحظات متراكمه ليوم سىء ضمن ايام سيئه بتعدى فى حياة الواحد
المفارقه الغريبه كانت الصبح وأنا رايح الشغل ... قعدت افتكر اسم مدونتى القديمه " عفريت منحوس" ... وافتكرت السؤال اللى اتسأل من صحفيين و باحثين و اصدقاء كتير فى السنين اللى فاتت
كان السؤال دايما ليه عفريت و ليه منحوس؟؟
كانت اجابتى وقتها ان المدونه اتعملت فى 2006 و كان ليا زمايل بيقولوا عفريت علشان كنت دايما راشق فى مجالات كتير ... عضو فى اكتر من حركه سياسيه و اكتر من حمله .. شغال فى شركه و كمان ليا مكتب صغير ليه شغل بعد الضهر.. بعمل دراسات عليا فى ادارة المشروعات الهندسيه و التخطيط
ومنحوس لإن مفيش حاجه من دول بتكمل للاخر
كنت امبارح الصبح بضحك على الاسم و بفكر اغيره ... عفريت مبسوط او عفريت اقرع ... أى اسم يتناسب مع المستجدات
لكن امبارح من الصبح وأنا عمال اخد صدمات ورا بعض خليتنى اعيد تفكير فى حاجات كتير
كانت اول صدمه لما روحت الشغل ولقيت ان فيه خبر انتشر ان الزياده فى المرتب هاتتصرف لادارة التخطيط الشهر ده ... قولت اخيرا .. بقالى سنه و نص مستحمل قرف الشغل علشان خاطر الزياده دى.
كانت الصدمه لما عرفت ان كل المهندسين اللى معايا زادوا بما فيهم الجداد الا انا تقريبا
طيب ليه ؟؟؟ دا السؤال اللى سألته للمدير الجديد اللى كان من فتره بسيطه زميل ليا فى نفس الاداره
علشان انت مش مركز و كل يوم بتفتح اللابتوب و تدخل على الفيسبوك وكمان بتاخد اجازات ولما كنت بتسافر الصعيد كنت بتعمل حاجات تانيه غير الشغل و تقابل زمايلك فى الحركه وبترجع من الصعيد مش مظبط شغلك ... ده كان رده
طيب و البهدله و السفر للصعيد بصوره شبه اسبوعيه و السهر و التعب ... كل ده مايشفعش؟؟
كل زمايلك فى نفس القرف مش انت لوحدك ومحدش منهم بيشتكى
وقعدنا فى جدال و رغى بدون اى نتيجه
انت كده بتقوللى امشى .. ... دا كان اخر تعليق ليا
اللى يريحك ... دا كان اخر تعليق ليه
يمكن كلامه كان فيه جزء كبير صح علشان كده مفكرتش فى الجدال لفتره اطول وان كنت متضايق انى مستحمل الشغلانه دى رغم انها بتستهلك وقت ومجهود ذهنى كبير وفى الاخر .. مفيش تقدير
الموضوع مش موضوع فلوس ..لو الواحد كان عايز فلوس كان عمل ايام المكتب.. بس أنا بتكلم عن التقدير
بس عموما السوق واسع و اكيد هلاقى وظيفه وقتها يسمح بالاهتمام بالسياسه و الدراسه

كانت الصدمه التانيه فى الدراسات العليا اللى بقالى 5 سنين مش عارف اخدها
الامتحانات بدأت يوم السبت اللى فات .. يالسخرية القدر
ازاى نسيت و ازاى ماذاكرتش ... مش عارف

والصدمه التالته كانت من بعض الاصدقاء المعتقلين بنجع حمادى
كعادة الوسط السياسى فى مصر .. يحصل سوء تفاهم و تلاقى واحد خبيث او مريض ياخد واحد على جنب و يرجع فى ودانه اى كلام فارغ
والتانى يسخن و يصدق او يفترض سوء النيه بدل افتراض حسن النيه
ويدخل اللى يسوى و اللى مايسواش يسخنوا الموضوع ... وتلاقى واحد مالوش دعوه بالليله اساسا بس بقاله سنين نفسه فى فرصه يشمت او يشتم
وتقوم حريقه من لا شىء
والناس تشيل من بعض والمشاعر الجميله اللى كانت من كام يوم تتحول لشىء اخر قبيح
ويتم تغليب سوء النيه على اى شىء و تسمع تفسيرات مريضه
واى حاجه كويسه تعملها تلاقيها تتفسر بنظرية المؤامره بدون اى محاوله للتفكير المنطقى او البحث عن الاسباب او التعليل او التأكد من الشائعه

لقيت نفسى بقول طب انا استفدت ايه من كل ده
وصلت لفين
عملت ايه
وبعد ده كله لا شغل ولا دراسات عليا ولا استقرار اسرى
مرتبى نظريا كبير لكن غرقان فى الديون لأسباب كتير
عندى خبره فى شغلى عاليه لكن الوضع زى ما هو ... حتى السياسه شكلها مفيش امل
الواحد لما يعمل حاجه تلاقى الف واحد يبوظهالك .. و لما مايعملش يسمع كلام مالوش لازمه
مزايدات لما تعمل و مزايدات لو ماعملتش

كتير بقعد اقول يلعن ابو السياسه على ابو اللى يفكر يشتغل فيها

بقت الناس بدل ما تتعاون مع بعض .. تلاقيهم متبنيين نظرية المؤامره و التفسيرات الغير منطقيه و بقت السياسه فى مصر اشبه بالمستنقع ومحدش بيهرب منه ... وفى الاخر بنكسر مجهود بعض و نتفرغ لتدمير بعض
مش هاقول انا الملاك اللى فى السياسه
انا كمان دخلت فى القرف اللى موجود و بقيت جزء منه

كان زمان لما الواحد بيخسر شغل كان بيقول معلش .. اهو الواحد عمل حاجه كويسه للبلد و بيحاول يغير
ولما ما اعرفش اكمل فى الدراسات اقول معلش اهو الواحد عمل حاجه تانيه كويسه
حتى السياسه شكلها مفيش فيها امل ... مجرد هم ووجع دماغ و تعب اعصاب وديون و مشاكل ومخاطره وخساره للأصدقاء
تفتكروا على الفاضى؟؟؟ ولا يمكن فيه امل؟؟؟

هناك 5 تعليقات:

Mohamed E.T يقول...

يا عم جوستي يعني ما شاء الله انا قريت قرابت ال٦ اشياء انت دايس فيهم و مجتهد فيهم ..يعني المجهود و التركيز قليل طبيعي المردود يكون قليل ...اختار واحد او انتين و ركز فيهم بالمجهود ده حتوصل اكيد
تحياتي

حلم بيعافر يقول...

هههههههه متزعلش نفسك ياعفريت ياخويا انا منحوس اكتر منك وان كنت مدرس مش زيك

Ebtsam يقول...

الزملاء الأعزاء تحيه طيبة وبعد:
تسعي الشبكة العربية لمعلومات حقوق الإنسان لإصدار مطبوعة دورية خاصة بالصحافة الشعبية تحت اسم "وصلة " تنشر فيها بعض مما ينشره المدونين من كتابات وتعليقات على الأوضاع المحيطة بهم في مصر والعالم العربي .
ونرجو مشاركتكم معنا في المطبوعة بالسماح لنا الاستعانة ببعض مما تكتبونه على مدوناتكم من موضوعات بعد موافقتكم على النشر .
نرجو سرعة الرد
مع الشكر
ابتسام تعلب
للتواصل
الايميل : wasla@anhri.net

egypt_son20005 يقول...

الحملة الشعبية المستقلة لدعم ترشيح البرادعي 2011 - رسالة عامة الرجاء مسحها حال قراءة المحتوى:
__________________________________________________

السلام عليكم ....

لا نعرف موقفكم من الدكتور البرادعي ... إذا كان موقفكم بالتأييد الرجاء الإنضمام لباقي المدونات المصرية بكل أصنافها واتجاهاتها ونشر هذا البانر على مدونتكم وربطه بلينك جروب الحملة على الفيس بوك ، حسب التعليمات المرفقة أدناه :
--------------------------------------------------
البانر عبارة عن صورة متحركة وبقياسات
187 88X

الرجاء وضعها في مكان بارز في المدونة ... من أجل مصر فقط !!

لينك الصورة :

http://elbarad3e.files.wordpress.com/2010/02/elbarad3e.gif

رابط جروب الحملة الرسمية على الفيس بوك الذي يجب ربطه بالصورة هو:

http://www.facebook.com/group.php?gid=123551066565
--------------------------------------------------

ندعم ترشيح البرادعي معاً من أجل مصر أفضل ...

فيديو ترويجي للحملة :
بعنوان : رسالة البرادعي للأمة

http://www.youtube.com/watch?v=OjZ9GpmAXeg

Mahmoud يقول...

مش عارف إيه اللي وقعني عالتدوينة دي دلوقتي وبعد الثورة وبعد الأيام اللي فاتت.

الحمد لله طلع فيه أمل، ولسه كمان فيه أمل تاني.