الخميس، 5 فبراير 2009

الرساله الاولى و الاخيره للمقدم محمد سعيد من مباحث امن الدوله.. عيب .. احنا مش بناكل من الكلام ده

فيه ظابط فى امن الدوله اسمه المقدم محمد سعيد.. أو ايا كان اسمه علشان كلهم بيستخدموا اسماء حركيه.
المهم الظابط ده يقال عنه انه محترم
و لكنه فى الفتره اللى فاتت بيتصل بوالد واحده زميلتنا نشيطه فى الحركه باستمرار و عايز يقابله مقابله وديه للنقاش
طبعا الاسلوب ده قديم و معروف خصوصا مع البنات.
الظابط يتصل بأهل البنت و يطلب يقابلهم و ساعات الظابط يكتفى بالتليفون فقط و يبدأ النقاش بالشكر و المدح و محاضره عن المعارضه المقبوله و المعارضه غير المقبوله .. على شوية ضحك او هزار و يبدأ زى بنتك ليه مع العيال المجانين دى.. و ده غلط .. و كده ممكن تأذى نفسها .. و إحنا خايفين عليك و عليها.. و انا بكلمك زى اخوك الكبير أو الصغير"حسب عمر الظابط و عمر الأب".
و احيانا الظابط بيرمى كل ورقه و يظهر الوش التانى فى أول قعده و احيانا بيأجله لو أول حوار ماجابش نتيجه.
و الوش التانى بيبقى عباره عن تهديد زى إحنا ممكن نبهدلك و نبهدلها.. و ممكن نضيعهالك فى لحظه و مالهاش عندنا ديه .. و محدش هاينفعها ولا هاينفعك و ممكن نعمل و نسوى و .. و..و..

ده الاسلوب المتبع بالضغط على اهالى البنات و استغلال خوف الاهل على عيالهم
فى بعض الحالات القليله خصوصا لو كانت البنت جديده.. الاهل بيضغطوا ضغط جامد و بيحاصروا البنت حصار عنيف و فى الاخر البنت بتبعد عن السياسه
و الاغلب الاعم الأهل بيضغطوا و البنت بتتصادم معاهم أو بتهدى لفتره و بتكمل بعدها تانى لأنها مقتنعه إنها مش بتعمل حاجه غلط و مقتنعه بالقضيه
و فى حالات اخرى تلاقى الاهل هما كمان مش خايفين و بيدخلوا شمال فى الظابط و بيقطعوا اى اتصال معاه.. لأنهم بيبقوا فاهمين إن كل ده تهويش و ضغط نفسى.. و ان بنتهم فعلا بتعمل حاجه كبيره و مش بتعمل حاجه غلط.

نرجع تانى للمقدم محمد سعيد
احنا بنسمع انك محترم... مجرد سماع
بس هل فيه ظابط محترم بيهدد اهل بنت لانها بتقول رأيها فى نظام الحكم اللى بيتعب اهلك زى ما بيتعبنا.
ممكن دى تكون اوامر من رئيسك... لكن هل ده يصح؟
هل تقبل إننا مثلا نفضحك قدام مراتك او اهلك أو نتصل بأى حد منهم ؟؟
هاتبقى فرحان مثلا لما يتعمل بلاغ ضدك انك بتهدد الناس بصوره غير قانونيه..و تتنشر صورك فى الجرايد و يبقى منظرك بايخ قصاد ولادك و معارفك و اهلك و قرايبك ؟؟
بالتاكيد لأ .. .. و رغم ان فيه حاجات كتييييييير مجنونه ممكن نعملها و احنا يا عم مش هانبدأ بالعداوه ... خلينا محضر خير

فنصيحه وقف اتصالاتك مع اهل البنت علشان مش هاتجيب اى نتيجه .. و اذا كان الراجل الطيب ساكت و بيرد عليك باحترام .. فده مش معناه انه خايف منك.
اقولك
قول للعميد أحمد السيد أو ايا كان اسم اللى مكلفك بالاتصال ان المحاوله فشلت .. و اطبعله الرساله دى و قدمها فى تقريرك
احنا مابناكلش من الكلام ده
عيب

الثلاثاء، 3 فبراير 2009

اعلن انضمامى لحركة مدونون من أجل الارهاب .. الحريه لمحمد عادل


كان أول مره اعرف فيها محمد عادل فى جروب شباب من اجل التغيير على الياهو فى صيف 2005
كان مصدع دماغنا بدفاعه عن الاخوان.. كل يوم خناقات و نقاش معاه.. و فى يوم كان فيه حد استفزه علشان ينزل معانا مظاهرات و يخرج عن طوع الاخوان.
و فى الاخر اتفاجئنا بطفل صغير بيقول انا محمد عادل
و كانت الدهشه و البلاهه على وجوه الجميع.. انت؟؟
انت عندك كام سنه يابنى؟؟ .. و لما قال انه عنده 16 سنه و داخل فى ال17 .. فيه ناس مننا جاتلهم تشنجات من كتر الضحك لسه ملازماهم لغاية دلوقتى.
بقى انت اللى مجننا و خانقنا على النت... انت؟
و بعد كده بفتره لاقيناه راشف فى أى حاجه.. اى موضوع تلاقيه موجود فيه.. و عرفنا بعدها انه مش عضو فى الاخوان كعضو تنظيمى.. و لكن ليه وجود و صلات كبيره بكوادر و شباب كتير منهم.. و كمان هو من بيت اخوانى
و لكن الحمدلله لم يؤثر قربه من الاخوان على تصرفاته بصفه عامه... و خصوصا اننا عرفنا ان عصبيته الغريبه اللى بتطلع فجاه و تختفى فجأه دى طبع فيه اساسا مش لانه اخوان ولا حاجه.

و فى اعتقالات القضاه فى صيف 2006 لقيته داخل عليا السجن فى احد الايام و هو مبتسم ابتسامته البلهاء
قولت فى نفسى .. ييييييييييه .. يعنى الواحد داخل السجن علشان يستريح و يهدى اعصابه.. يقوم يجيله جوه السجن محمد عادل.. انت ايه اللى نزلك مظاهرات يابنى... مش فاكر وقتها كان رده ايه .. بس هو عموما لما بيتعصب بيبتسم و يقول عايز ايه ياض.. مش عاجبك ولا ايه.. على شوية خبطات فى الكتف او لكمات فى الفكين على سبيل الهزار الحميم.

و طبعا لا يمكن انسى انه كان ماسك الإعاشه جوه السجن و كان بيصادر اى اكل او مستلزمات بتيجى من اهالينا او من لجان الاعاشه.. و يوزعها على الكل بعد كده بالقطاره ..و كان مجوعنا و منشفها علينا خصوصا فى السجاير.
المهم نخرج من السجن و تمر الايام و ابص الاقى محمد عادل فى كل حته.. فى اى مظاهره أو مؤتمر او ندوه او اجتماع... لدرجة انى ساعات كنت بخاف انى افتح الحنفيه و الاقى محمد عادل نازل منها.

حتى فى شباب 6 ابريل.. رغم عدائه لتلك الحركه الوليده كمعظم المدونين... و رغم التريقه اللى كان بيقولها فى السر والعلن.. لكن برضه كنا بنلاقيه بيشارك فى معظم انشطتها و بيدعمها بقوه و ينشر الاخبار و يساعد فى اى حاجه محتاجينها.
بصراحه.. انا اكتشفت انى بحب محمد عادل جدا.
و اكتشفت انه واحشنى جدا و انه كان حد طيب و محترم و صافى رغم غلاسته .
و اعتقد ان محدش يقدر ينكر إن محمد عادل راجل فى قمة الجدعنه و الاخلاص لقضية التغيير

مش عارف ازاى المتخلفين بتوع امن الدوله عملوله قضيه تافهه زيهم علشان يعطلوه عن دعمه لغزه و قوافل فك الحصار
قضيه تافهه عملها ظابط تافه ان دلت على شىء فإنما تدل على تفاهة الجهاز المسمى بمباحث امن الدوله.. و انه جهاز بارع فقط فى حماية لصوص الحزب الوطنى بكل الوسائل الغير قانونيه و الغير مشروعه
و بما انهم تافهين.. و بما اننا مجانين... فقد قررت و أنا بكامل قواى العقليه أن انضم لحركة مدونون من أجل الارهاب..

و زى ما هو اتمسك بسبب انه متصور فى غزه بسلاح فشنك.. و لفقوله بسبب الصوره الطفوليه دى قضية الانضمام لتنظيم مسلح و تلقى تدريبات عسكريه
و اخيرا قدرت اجيب حتة سلاح خرز علشان اقدر انضم للتنظيم الجديد... و يمكن يضمونا للقضيه التافهه بتاعة محمد عادل و أخد أجازه من الشغل و اريح اعصابى شويه فى السجن

و اعلن كامل ولائى للتنظيم و انى مستعد لتنفيذ أى عمليه يتم تكليفى بها
و جارى اعداد عشرة الاف مقاتل ابريلى مستعدون للتضحيه بكل ما يملكون من خرز فداء لمحمد عادل


أحمد ماهر
عضو بحركة مدونون من أجل الارهاب



الاخوه المجاهدون

الملا وائل عباس امير المدونين

www.misrdigital.com

اسد

http://www.asadx.net/

مواطن مصرى واخد على قفاه

http://www.egymasr.com/?p=441

الحاج جرجس

http://egyptwatchman.blogspot.com/2009/02/blog-post.html