الجمعة، 23 أكتوبر، 2009

حركة شباب 6 ابريل ترحب بمقاطعة احزاب الوفد و التجمع و الناصرى لمؤتمر القله المندسه

حركة شباب 6 ابريل ترحب بمقاطعة احزاب الوفد و التجمع و الناصرى لمؤتمر القله المندسه

رحبت حركة شباب 6 ابريل بمقاطعة احزاب الوفد و التجمع و الناصرى لمؤتمر الحركه الثانى الموازى لمؤتمر الحزب الوطنى و الذى يحمل عنوان مؤتمر القله المندسه . هنا القاهره و ليس الجابون و الذى يعتبر اولى مشاركات الحركه عمليا فى الحمله المصريه ضد التوريث تحت قيادة منسقها الدكتور حسن نافعه

و ذكرت الحركه فى بيانها انها تشكر تلك الاحزاب على مقاطعتها لمؤتمر القله المندسه وخصوصا بعد ذكرهم لحجج واهيه عن مشاركة عبدالحليم قنديل "رغم عدم مشاركته من الأساس" او عدم اهمية مؤتمر الحزب الوطنى.. وان تلك الاحزاب هى التى افسدت الحياه السياسيه فى مصر و افسدت اجيال كامله و اصابت آلاف الشباب بالاحباط بسبب خنوعها و صفقاتها مع الحزب الوطنى من اجل الفوز ببعض المقاعد البرلمانيه وخروجها عن اجماع باقى المعارضه.

و الجدير بالذكر ان الحركه سوف تعقد مؤتمر القله المندسه الثانى فى اواخر اكتوبر الحالى تحت عنوان هنا القاهره و ليس الجابون و يتكون من مؤتمر افتراضى على الانترنت لمدة ثلاثة ايام و ينتهى بجلسه ختاميه على ارض الواقع و يستضيفها حزب الجبهه الديمقراطيه فى مقره بالمهندسين بعد رفض نقابتى الصحفيين و المحاميين و عدد من الفنادق و المسارح بسبب رفض الجهات الأمنيه.

وسوف يتحدث المؤتمر فى عدد من المحاور مثل الاقتصاد و التعليم و الصحه و الاسكان و حقوق الانسان و يستضيف عدد من الشخصيات السياسيه و الاكاديميه سواء على المؤتمر الافتراضى على موقع الحركه او فى الجلسه الختاميه مثل د.أيمن نور و د. اسامه الغزالى حرب و النائب محمد انور السادات و المهندس ابوالعلاماضى ود.ممدوح حمزه و د.يحى الجمل و جورج اسحاق و الاستاذه سكينه فؤاد و الاستاذ جمال عيد وأحمد سيف الاسلام
ونادر فرجانى - جلال أمين - إلهامى الميرغنى – جودة عبد الخالق و فهمى هويدى – وإبراهيم زهران – والسفير إبراهيم يسرى والعديد من الشخصيات العامه و الاكاديميه و السياسيه

كما بدات الحركه فى تجهيز طرحها الخاص للخروج من الازمه الحاليه و الذى سيكون مفاجأه الحركه التى سيتم تقديمها فى المؤتمر الذى يعتبر تعتبره الحركه اولى مشاركه عمليه فى الحملة المصريه ضد التوريث .


للمزيد من المعلومات

الجروب الرئيسى على الفيسبوك
http://www.facebook.com/group.php?gid=9973986703


البث التجريبى لموقع شباب 6 ابريل
http://6april.org


المجموعه البريديه لشباب 6 ابريل نرجوا الاشتراك الآن
http://groups.yahoo.com/group/shabab6april
/

مدونة شباب 6 ابريل
http://shabab6april.wordpress.com


خدمة تويتر لشباب 6 ابريل
اشترك على تويتر و اعمل تتبع لشباب 6 ابريل
وتوصلك اخبارنا على طول
http://twitter.com/shabab6april


الايميل الرسمى للحركه
shabab6april.mov@gmail.com


0102864919

0110479445

عصر انهيار السكه الحديد .. المصرى اللى على حق يقول للغلط لأ

عصر انهيار السكه الحديد .. المصرى اللى على حق يقول للغلط لأ
المصرى اللى على حق يقول للتوريث لأ
لشلة جمال من رجال الاعمال لأ

قرفونا بالإعلانات اللى بتبشر بعهد جديد لسكك حديد مصر و انها هاترجع نضيفه و منضبطه زى أيام الانجليز و يمكن أحسن شويه

و فرحانين بصفقة الجرارات العملاقه اللى تم شراءها مؤخرا
و بدأ التبشير بإنتهاء عهد تأخر مواعيد القطارات و إن خلاص مابقاش فيه جرارات بتعطل

والحق يقال ... بالفعل من اول ما الجرارات العملاقه دخلت الخدمه فى السكه الحديد و المواعيد بالفعل اتظبطت
و لكن النظام الفاشل كما كان
لو دخلت احد القطارات الفاخره اللى تذكرتها من بخمسين جنيه من القاهره للاسكندريه أو ب 150 من القاهره لأسوان هتلاقى دايما مشاكل من عينة التكييف اللى عطلان لدورات المياه ذات الرائحه الفائحه لعدم نظافة عربات القطار من الداخل لعدم القدره على اغلاق الابواب بسبب تآكل المفصلات احيانا
دا طبعا غير الفيران اللى ساعات بتجرى فى القطر و بتسبب ذعر بين الركاب وطبعا سرقة الشنط

اللى فات ده فى الدرجات الفاخره

تخيل بقى قطار الغلابه بيبقى عامل ازاى ... و قطر الغلابه ده بيسموه مميز علشان شالوا الكراسى الخشب و استبدلوها بكراسى من الفايبر و البلاستيك شكلها انضف لكن غير مريحه
فى قطارات الغلابه طبيعى جد انك تلاقى الناس واقفين فوق بعض واحيانا متشعبطين حتى لو القطر رايح اسوان
و كلمة دورة مياه بتبقى غريبه جدا لعدم وجودها اساسا... انت هتلاقى صحيح باب مكتوب عليه w c لكن يا إما هتلاقيه مليان قذاره بطريقه مفزعه
يا اما هتلاقى الناس ناسيين انها كانت دورة مياه اساسا وقاعدين فيها لعدم وجود مكان بديل
حتى لو فيه موسم أو عيد أو وقت صيف أو سفر أو دراسه ... برضه هتلاقى عدد القطارات ثابت و مش بيزيد
و الخدمه و النظافه من سىء لأسوأ
ويوم ما يشتروا جرارات عملاقه يقعدوا يذلونا بيها و يعملوا اعلانات تتكلف ملايين
الكارثه اساسا طلعت فى الجرارات دى
تم توريدها بدون دراسه تأثيرها على التربه و السكه الحديد نفسها
جرارات وزنها 180 طن بتجرى بسرعه على السكه الحديد اللى كانت شايله الجرارات اللى وزنها 100 طن بالعافيه
بالتأكيد أول ما اشتغلت الجرارات العملاقه الجديده المواعيد اتظبطت لمدة كام شهر
وطبعا التربه اللى تحت السكه انهارت مع الشغل بمرور الوقت و خصوصا انها من ايام الانجليز
و مع الهبوط للتربه سببت مشاكل لكل القطارات .. وبدات اعمال الصيانه اللى مش بتحصل غير بعد الكوارث
حقن للتربه و استبدال التالف من السكه الحديد ... و الكارثه هى رجوع الجرارت القديمه للعمل تانى و بطء حركة سير القطارات.
ولا حد درس ولا حد شاف تأثير الوزن و الاهتزازات
الحاج منصور شيفورليه وزير النقل بتاعنا كل اللى كان يهمه انه يستورد جرارات غاليه من جنيرال موتورز اللى هو اساسا صاحب توكيلاتها فى مصر
و ينزل حمله اعلانيه ضخمه يكمل بيها اشتغالات برنامج السيىء الرئيس الانتخابى

فكر جديد و عبور للمستقبل ... على سكه متهالكه و اساس لا يتحمل

يعنى ايه القله المندسه

أكيد سمعت المصطلح ده قبل كده

القله المندسه

بتسمعه فى النشره او بتقراه فى الجرايد بعد الاحداث الكبيره

لما بتلاقى تزوير فاضح للإنتخابات و تلاقى ناس بتعترض .. تلاقى حكومة الحزب الوطنى تقولك دول قله مندسه

و لما تلاقى ناس تعترض على زيادة الأسعار تلاقى حكومة الحزب الوطنى بتقول فى اجهزة الاعلام إن دول قله مندسه

و لما تلاقى ناس بتقف ضد الظلم برضه يقولوك سيبك منهم دول قله مندسه

و لما تلاقى ناس بتطالب بحقوق الناس و تفضح فساد رجال اعمال الحزب الوطنى برضه هايقولوك عليهم دول قله مندسه

العمال و الموظفين و المدرسين اللى بيطالبوا بحقوقهم كل يوم ... هايقولوك عليهم قله مندسه


و كل الاحزاب و الحركات و التيارات من اليمين لليسار
الوفد و التجمع و الناصرى و الغد و الجبهه
الاخوان المسلمين و كفايه
شباب 6 ابريل
كل التيارات و الافكار
ليبراليين و اشتراكيين و ناصريين و اسلاميين

برضه حكومة الحزب الوطنى بتسميهم قله مندسه

حتى آلاف العمال و آلاف الموظفين اللى بيعملوا اضرابات كل يوم علشان يطالبوا بحقوقهم المشروعه .. بيقولوك عليهم دول قله مندسه


رغم إن الاغلبيه اللى بيزعمها الحزب الوطنى ... جايه أساسا من تزوير الانتخابات و البلطجه و استغلال موارد الدوله بطريقه غير مشروعه


إحنا بقى قررنا نجمع كل القله المندسه فى مكان واحد


لو انت مندس زينا شارك معانا


لو انت من القله المندسه اللى بيقولوا عليها ... يعنى سياسى معارض من اى تيار و بتعانى من الظلم و الاضطهاد السياسى .. أو حتى ماليكش فى السياسه .. سواء طالب مش لاقى تعليم كويس أو موظف بتقبض مرتب مش بيكفى المواصلات .. أو عامل مهضومه حقوقك
أو مواطن اتعرض للظلم فى التعامل مع ظباط الداخليه.. يبقى انت من القله المندسه زينا

شارك معانا فى مؤتمرنا

مؤتمر القله المندسه الثانى ...الموازى لمؤتمر الحزب الوطنى

تحت شعار
هنا القاهره و ليس الجابون





للمزيد من المعلومات

تابعونا

الجروب الرئيسى على الفيسبوك
http://www.facebook.com/group.php?gid=9973986703


البث التجريبى لموقع شباب 6 ابريل
http://6april.org



المجموعه البريديه لشباب 6 ابريل نرجوا الاشتراك الآن
http://groups.yahoo.com/group/shabab6april/


مدونة شباب 6 ابريل
http://shabab6april.wordpress.com


خدمة تويتر لشباب 6 ابريل
اشترك على تويتر و اعمل تتبع لشباب 6 ابريل
وتوصلك اخبارنا على طول
http://twitter.com/shabab6april

الايميل الرسمى للحركه
shabab6april.mov@gmail.com


0102864919

0110479445




☺♠○•○•○•○•○•○•○•○•○•○•○•○•
○•○•○•○•○•○•○•○•♠
☺♠"ـــــــــPLEASE & PLEASE" INVITE YouR FRIEND'Sــــــ☺♠
☺♠ـــــــــــــــــــWE NeeD MORE MEMBERSـــــــــــــــــــ☺♠
☺♠○•○•○•○•○•○•○•○•○•○•○•○•○•○•○•○•○•○•○•○☺♠

╔═════════════════╗
║ INVITE ALL YOUR FRIENDS ║
╚═════════════════╝

ياريت كلنا نتبع الخطوات الاتية:
1 - انضم للايفينت بالضغط على
http://www.facebook.com/event.php?eid=140367322450

ثم
attending
في اليمين تحت الصورة.

2 - اضغط على
Invite People to come
في اليمين تحت الصورة.

3 - اختار كل الاصدقاء في قائمتك

4 -اضغط على
Send invitation

5- وكمان ما تنساش تنشر الايفينت على الوول بتاعك فى خطوه واحده عن طريق الضغط على
share
تحت الصوره على اليمين

6- شكرا
thank you

الأحد، 23 أغسطس، 2009

كل واحد يخللى باله من بنيته التحتيه

البرادعه و التيفود و الصرف الصحى و الصعيد .. كله داخل على كله
و كل واحد يخللى باله من بنيته التحتيه ..أصل الحكومه خلاص نفضت

كنت الاول ناوى اكتب تدوينه عن شرح لبعض المصطلحات و المشكله اللى بتحصل فى مصر دلوقتى من انتشار التيفود و الكارثه اللى مصر مقبله عليها بسبب عشوائية التخطيط

لكن لقيت انى لازم احكى القصه من البدايه .. أو احط مقدمه ممكن ماتشوفش ليها لازمه لكن لازم احط تسلسل الاحداث

البدايه لما كنت فى اعدادى هندسه فى 1997 أيام ما كان قسم مدنى من افضل اقسام الهندسه و كان دخول قسم مدنى بيعتبر حلم كبير
وقتها كان لسه مفيش هندسة كمبيوتر و كان قسم هندسة الاتصالات بدأ يكون ليه اسم كبير


و قسم الهندسه المدنيه يحتوى على عشرات التخصصات
تندرج تحت تخصصين رئيسيين

الانشاءات و يندرج تحتها تصميم وكذلك تنفيذ المنشئات الخرسانيه... و المنشئات المعدنيه.. و الكبارى... و الانفاق... و ميكانيكا التربه... و تصميم الهياكل الانشائيه ... و ادارة المشروعات الهندسيه

و قسم الاشغال العامه و يندرج تحتها تصميم أو تنفيذ الطرق.. و المطارات ...و شبكات المياه و اساليب تنقية و معالجة المياه و شبكات الصرف الصحى ... و انظمة الرى ...و السكك الحديديه

و بعد ما دخلت قسم مدنى بدأ سعر الحديد يتضاعف من 750 جنيه ل 1500 جنيه ل 3000 جنيه خلال شهور
و السوق العقارى وقف و الانشاءات قلت جدا و بقوا مهندسين المدنى مرميين على القهاوى

و بسبب ظروف السوق الكل كان بينصح الالتحاق بأقسام الاشغال العامه من صرف و تنقية مياه و طرق و رى و سكه حديد حيث ان تلك المشروعات لا تتوقف

و لكنى فضلت الالتحاق بقسم الانشاءات و كان مشروع تخرجى فى تصميم المنشئات الخرسانيه و الكبارى و المنشئات الغير تقليديه و كان المشروع الثانوى فى ادارة المشروعات الهندسيه

و لم ادخل قسم تصميم المنشئات المعدنيه نظرا لظروف السوف و ندرة تلك المنشئات فى مصر

وقت تخرجى فى 2004 كان مرتب الخريج من 300 جنيه ل 450 جنيه
و كان مرتب ذوى الخبره 3 سنوات مابيعديش 1000 جنيه
و كان ممكن تلاقى خبره 5 سنوات و مرتبه برضه 1000 جنيه
و فى 2004 و 2005 كان المهندس المدنى او العماره لازم يبقى قرد ..لازم يكون مهندس تصميم و تنفيذ و مساح و محاسب وعامل ومشرف
و لو مش هاتبقى قرد و تعمل كل حاجه ... فيه الاف المهندسين المرميين على القهاوى

و سوق المقاولات فى مصر عموما ليه قواعد خاصه
لازم تبقى سافل و قاسى القلب
فى سوق المقاولات مفيش حاجه اسمها رحمه الا فيما ندر
مهمتك انك تحقق اكبر مكاسب و اقل خسائر باقل سعر و اقل وقت و كفاءه عاليه .. و ساعات الكفاءه بتبقى مش مهمه فى شركات كتير لإن الالتزام بالمواصفات بيكلف فلوس .. و كله عايز يوفر
المهندس لازم ياكل المقاول أو المورد أو العامل .. و المقاول لازم ينصب على المهندس و يشتغله و يطلسق الشغل و يحقق اكبر ربح .. و العامل لازم يحقق اكبر ربح بأق مجهود .. و المورد يجيبلك بضاعه بايظه و يبيعهالك بسعر النضيف و الرمله بتبقى ناتج حفر ارض جنبك
و كله بياكل كله
و الغلطه بموته

و طبعا كان عندى مشكله كبيره فى التعامل فى الوسط ده فى البدايه
لازم الواحد يكون مفتح و مدردح و حورتجى و صايع و سافل و لسانه طويل

و المواهب دى ماكانتش موجوده عندى فى البدايه

و لجأت لطريقه كانت نادره جدا و تقريبا مش معترف بيها فى السوق
و هى انى بدل ما اقعد طول النهار اشتم و اسب الدين و ازعق و اتخانق
بقيت اتصاحب على المقاولين و العمال
و اكل معاهم و اهرج معاهم
و احضر مناسباتهم
و ده كان بيخللى الناس تديك الشغل الصح من غير قلة ادب
بس برضه مش بينفع مع كل الناس ... لأننا مصريين
فيه ناس سفله لازم تتعامل معاهم بسفاله
و اللى كان بيبقى سافل او يتطاول او يفتكر المهندس ده طيب بقى و بيهرج و بيصاحب الناس او طيب و ممكن نشتغله
كان بيندم اشد ندم بعد نفاذ كل درجات الرأفه

و فى حالات قليله كان لازم الظروف تجبرك انك تكون ندل
مثلا تبقى واعد عامل او صنايعى بمبلغ معين اخر الاسبوع
و فجأه تلاقى المحاسب مجاش
او صاحب الشغل نفض و قفل تليفونه
او الشيك ما اتصرفش
او اى مشكله
ساعتها يا اما تدفع من جيبك و تتخيط انت
يا تخلع انت كمان و تحاول تنسى منظر الراجل و هو مروح لعياله اخر الاسبوع و ماجابلهومش حاجه
أو مورد بقاله اسبوع بيوردلك و فجاه الشركه حصل فيها ازمه ماليه.. و تيجى اخر الاسبوع تلاقى الديانه واقفالك
يبقى اقفل تليفونك يا معلم و اتنكر و اخلع و ماترجعش الموقع الا لما يكون معاك فلوس

وطبعا الغفير بتاعك هو اللى بتسيبه يشيل الليله و يتعامل هو مع الناس
و تراضيه لما تيجى فلوس
و تراضى كل الناس اللى نفضتلهم يوم الخميس

لإن يوم الخميس ده بيبقى اليوم المقدس فى سوق المقاولات فى مصر

و برضه كانت بتحصل مقالب من المقاولين او الموردين او العمال
زى انك تكون مجهز لشغل و جايب ناس بفلوس .. و تكون مرتب على توريد الخامات فى يوم معين .. و فجاه تلاقى المورد اختفى
او ماعرفش يجيب خامات او الناس نفضوله

و تلبس انت خساره بالالاف

هو السوق كده

بس بداية من 2006 و 2007 الظروف تغيرت تماما
أعداد مهوله من المهندسين المصريين سافروا الخليج
و العراقيين نزحوا باعداد مهوله للسكن فى القاهره الجديده و اكتوبر
و المصريين فى الخارج ابتدوا يفكروا فى الاستثمار العقارى

والسوق العقارى انتعش بصوره مهوله
و كله بقى يبنى أو يشطب او يجدد
و قفز سعر الشقق من 800 جنيه للمتر الى 2800 جنيه للمتر خلال سنه واحده ووصل فى بعض الاماكن ل 3500 جنيه للمتر نصف تشطيب

و بقى المهندسين المدنى عمله نادره
و بعد ما كان خريج 2004 ب 300 جنيه و اللى مش عاجبه يمشى .. بقى خريج 2006 ب 1500 جنيه و خريج 2007 ب 2000 جنيه

و اللى عنده خبره 3 سنين بيتكلم فى 3500 مرتب جنيه و اللى عنده خبره 5 سنين بيتكلم فى 5000 جنيه فى الشهر غير البدلات

و دا كمان كان فى الشركات المتوسطه

لكن لو شركه كبيره او شركه اجنبيه و عندك خبره 4 سنين او خمسه
يعنى بتتكلم فى مرتب 6000 وانت طالع

و ياسلام بقى لو تشوفلك فيللا تمسكها اشراف بعد الشغل او شوية تصميمات او برنامج زمنى
البليه هاتلعب و هاتتظبط
انا نفسى فتحت شركه صغيره فى نهاية 2007 و حتى مايو 2008 و كانت الدنيا قشطه

و الدنيا باظت معايا لأسباب كتر كنت قولتها فى تدوينات قديمه مش عايز اقولها تانى

و فى منتصف 2008 بدأ سوق العقارات فى التشبع و الاسعار تثبت ثم تقل
و مع بداية الازمه العالميه بدا المهندسين المصريين يرجعوا من الخليج
و الشغل فى مصر بدأ يقل
و المرتبات بدات تقل
و كل اللى كان فاتح مكتب او شركه صغيره بدأ يخسر
و الحديد ارتفع سعره ل 9000 جنيه فجأه
و الدنيا وقفت

و رجعت تانى الشركات تتنك على المهندسين

و معلش يا بشمهندس هانوقف البدلات
و شويه و معلش يابشمهندس المرتب هايقل شويه علشان الظروف

و اللى مش عاجبه فيه زيه كتير على القهاوى

و حتى فرصه السفر للخليج بقت صعبه



ايه يا عم الرغى ده
مالنا احنا و مال الكلام ده كله
فين البرادعه و الصرف الصحى و الكارثه

هاقول اهوه

فى منتصف 2008 لما خسرت فى المقاولات ... كان فيه فرصه انى اعوض الخساره و ابدأ اكمل تانى و لكن كان لازم وقت و تفرغ للشغل و طبعا كان مستحيل يحصل ده فى مايو و يوليو و اغسطس 2008
فكان الحل الاسلم هو البحث عن شركه كبيره و شغاله فى مجال هندسه مدنيه غير متقلب و غير مرتبط بظروف السوق

و كان الحل فى مشروعات تنقية المياه و محطات المياه و انشاء الخزانات و شبكات المياه و الرى و الصرف
يعنى شغل البنيه التحتيه

و دا كان مجال تأثره ضعيف بتقلبات السوق
و معروف ان مهندس الاشغال أو شغل البنيه التحتيه بيكون مرتباتهم عاليه علشان الشغل ببقى صعب و متعب جدا

و بسبب ان تخصصى اساسا بعيد عن هذا المجال المضمون.. فكان شغلى فى ادارة تلك المشروعات اللى بتحتاج تخطيط جيد و تحديث مستمر للخطه

لانها بتتكلف ملايين و اى خساره او تأخير بيبقى بالملايين

و لما قربت من هذا المجال و كان فيه السنه اللى فاتت انفتاح كبير فى مجال الخدمات و مشروعات البنيه التحتيه و خصوصا للقرى المحرومه

مشروعات بمليارات الجنيهات سنويا

و القطاع الخاص دخل بتقله فى المجال ده بالمنافسه مع الشركات الكبرى زى المقاولين العرب و حسن علام و مختار ابراهيم

و الدنيا ماشيه و المرتبات عاليه و مستقره و الدنيا زى الفل

و المشروعات دى بتكون جزء منها من ميزانية الدوله سنويا
و جزء كبير جدا منها (و الحته دى لبتوع لن تمروا) بيكون من المعونه الامريكيه و الاوربيه و منح من دول أخرى
مئات الملايين من الدولارات سنويا من المعونات الاجنبيه لبناء مشروعات البنيه التحتيه

و بقالى سنه كل يوم مشروعات زيادة كفاءة محطات تنقيه و معالجة صرف صحى و غابات شجريه و خزانات و خرسانات

و بقيت اشوف قرى فى الصعيد و كمان فى القاهره بعدد سكان كبير و كانوا عايشين فى القرن ال 18 بدون ميه نضيفه او تصريف سليم لمخلفات الصرف الصحى

و لقيت ان الاف القرى فى صعيد مصر و كمان داخل القاهره محرومين من المياه النظيفه و الخدمات الاساسيه

و فجأه من حوالى 4 او خمس شهور
بدا الايقاف المفاجىء لمعظم مشروعات تنقية المياه او شبكات الصرف الصحى او معالجة الصرف الصحى لكل الشركات

قرار سيادى مفاجىء بدون ترتيب

و شركات مقاولات كتير خسرت ملايين طائله فى الشهور القليله الماضيه
شركات حكوميه و خاصه

و كل الشركات حاليا بتحاول تلم الشغل و تهرب بأقل خسائر

و المشاريع اللى اتدفع فيها مليارات الجنيهات و الدولارات لم تكتمل

و ضاعت مليارات الجنيهات و الدولارات بدون استفاده حقيقيه بسبب هذا القرار السيادى الغير معلوم سببه

و مازالت جميع شركات المقاولات الكبرى حاليا تهرول لتقليل الخساره الفادحه
و منها مشروعات كان قد تم انشاء فيها شبكات صرف جزئيه و تكسير نظام الصرف القديم القائم على نزح الطرنشات
و فجاه توقفت
ولا فيه طرنشات الناس تنزحها
ولا فيه شبكات صرف

و الدنيا باظت

و ده احد اسباب اختلاط مياه الشرب بالصرف الصحى و تشبع التربه بمياه الصرف

فيه نقطتين عايز اتكلم فيهم كانت الجرايد اتكلمت عنهم لما بدات الازمه تكبر
نقطة تنقية المياه و كيفية اختلاطها بمياه الصرف

و نقطة المعالجه الثنائيه و المعالجه الثلاثيه

صحيح انا مش مهندس موقع فى مجالات المياه
و لكن بما انى شغال فى التخطيط للمشروعات فلازم يبقى عندى المعلومات العلميه الكافيه عن التنفيذ

و هحاول اشرع بصوره مبسطه وبدون مصطلحات علميه مكلكعه

اولا تنقية المياه فى مصر بتقوم على طريقه واحده و الاختلاف من مكان لمكان بيبقى فى التفاصيل
الفكره الاساسيه فى تنقية المياه فى مصر هى فصل الدهون عن المياه بواسطة الشبه و قتل الميكروبات و الجراثيم و المواد العضويه بواسطة الكلور

بس

الاول المياه بتيجى من خلال المأخذ اللى بيكون فى النيل ولازم يكون بعيد عن القاع و بعيد عن اى مكان تلوث ولازم يحيط بيه شبكه مصافى

و بالنسبه للقرى البعيده عن النيل بيكون المأخذ فى الترعه علشان كده بتلاقى معظم المياه اللى فى الارياف بتبقى مالحه شويه و مش بتدوب الصابون
و ساعات محطات التنقيه بتاخد من المياه الجوفيه

و بتروح على احواض خرسانيه ضخمه دائريه اسمها المروقات و بيتحط عليها مادة الشبه
ايوه هى الشبه بتاعة الحلاقه و هى الشبه اللى حطوها على الأكل فى فيلم 30 يوم فى السجن و ماعرفوش يتكلموا

بعد الاضافه بتلاقى الدهون بتتحد مع الشبه و تكون روبه بيتم فصلها بطرق معينه
و بعدين بيتم اضافة كلور اولى لقتل الجراثيم و المواد العضويه و اى كائنات حيه اخرى

و بعدين بتروح على احواض خرسانيه ضخمه جدا اسمها المرشحات
و دى بتكون الفلاتر الرمليه و الزلطيه

و فيها المياه بتدخل على طبقة زلط مختلف الاحجام ثم طبقة رمل

و الميه بتطلع نضيفه و بعدين بتروح للتخزين فى خزانات خرسانيه ارضيه او تحت الارض و بتكون ضخمه جدا و بيتم قبلها اضافة الكلور الثانوى للتاكد من قتل الميكروبات و بيتم اضافة اليود (والمرحله الاخيره دى مش فى كل الاماكن فى مصر)

و بعدين بيتم رفعها بواسطة طلمبات للخزانات الخرسانيه العاليه اللى المفروض تكون ارتفاعتها اكبر و اعلى من أعلى مبنى فى القريه أو المدينه او الحى

الاختلافات بين المراحل دى بتبقى بسيطه
لكن الاهتمام بيبقى فى المدن الكبرى اكتر من الاقليميه و فى المدن الاقليميه اكبر من القرى

لكن بره مصر بيكون التعقيم عن طريق الأوزون بدل الكلور اللى بنحطه عندنا
و بتكون الفلتره بفلاتر كربونيه بدل الفلاتر الزلطيه و الرمليه اللى فى مصر

كده توصلنا لنتيجة ان الفلتره و التعقيم فى مصر مش بيكون بنسبة 100% لكن ممكن نقول انه 80 % فى اماكن و 60 % فى اماكن اخرى بسبب ضعف الامكانيات

و لكن المشكله الاكبر هى فى الشبكات

الطبيعى و البديهى و المنطقى ان كل دول العالم المتحضر بتفضل تجدد شبكاتها و تعمل صيانه طول الوقت
لأن اى شبكات مياه لازم يكون ليها عمر انفرادى

زمان كانت مواسير الشبكات من الصلب او الزهر

دلوقتى بقى فيه بروبلين و مواد تانيه

الطبيعى ان لازم يتعمل احلال تحت مواسير الشبكات يعنى استبدال التربه الضعيفه بتربه قويه
و الطبيعى ان يحصل تغليف للمواسير

و لكن ساعات بيحصل غير كده من بعض شركات المقاولات و ساعات مهندس الحكومه بينفض يستلم من مهندس شركة المقاولات و فيه حوارات كتير فى الجزئيه دى و مئات الالعاب
و بيحصل هبوط للتربه تحت المواسير و بتحصل شروخ بتسمح بتسريب المياه من و الى المواسير

دا غير ان المواسير بيكون ليها عمر افتراضى و بتصدى
وطبيعى انها تتغير كل فتره

انا عندى فى التجمع الخامس الميه على طول صفرا و ساعات بنى من صدأ المواسير و أخيرا جيبت فلتر فى البيت

و بسبب عدم الصيانه الدوريه للشبكات بيحصل اختلاط مياه الصرف بمياه الشرب فى بعض المناطق خصوصا ذات التربه الطينيه و المياه الجوفيه


نيجى بقى على معالجة الصرف الصحى
وكنا قرينا فى الجرايد عبارات زى المعالجه الثنائيه و الثلاثيه


الاول مياه الصرف بتتجمع من البيوت على المطابق ثم للشبكات ثم لمحطات الرفع و بعدين بيبقى فيه خطوط طرد بترمى مياه الصرف الصحى فى حفره كبيره جدا اسمها الخور لو فيه منطقه صحراويه و الميه دى بتنزل فى الارض و تتصفى و تنضف بعد مرور السنين و احيانا بسبب طبقات الصخور الارضيه بتضم على الابار الجوفيه الطبيعيه العملاقه زى البئر الجوفى الطبيعى فى الصحراء الغربيه فى مصر اللى بيشرب ليبيا كلها و احنا استفادتنا منه قليله جدا فى الرى
و ممكن بعد سنين بيتم حفر ابار جوفيه عميقه و بيتم استخراج المياه الطبيعيه و تستخدم فى الرى او فى الشرب بعد تعقيمها جيدا أو بيتم تعبئتها كمياه طبيعيه (مش جوفيه)

اما لو مفيش منطق صحراويه محيطه فبيتم معالجتها و القائها فى المصارف الزراعيه و برضه بترجع تانى للترع و للرى منها بس بعد ما تاخد دورتها

و منذ سنوات قليله بدات الدوله تستفيد من مياه الصرف و معالجتها و انشاء غابات شجريه أو استخدامها فى الرى بعد المعالجه

و مؤخرا كان مكتوب فى بعض الصحف ان المعالجه فى معظم قرى الدلتا ثنائيه و ليست ثلاثيه بسبب عدم وجود ظهير صحراوى

المعالجه الثنائيه لمياه الصرف موجوده فى كل قرى مصر و بيتم القاء المياه فى المصارف الزراعيه
و المعالجه عموما بتكون بتصفية مياه الصرف فى المصافى و دى اللى بتحجز الشباشب و كياس الشيبسى وفرد الكاوتش و جثث الحيوانات الصغيره و احيانا جثث البنى ادمين

و بتدخل فى احواض عملاقه للاكسده باستخدام البكتيريا الهوائيه واللاهوائيه لتفتيت المواد الصلبه
و بعدين بتدخل فى احواض ترسيب بتعمل زى الفلتره و يتم اضافة كلور لتقتل الجراثيم و بعدين بتترمى على المصارف الزراعيه

اما المعالجه الثلاثيه فبتكون بمراحل اكثر و بتخرج منها ميه صالحه لاعادة الاستخدام و بيتم رى الغابات الشجريه و مياه الزراعه عموما و لكن بتبقى غير صالحه للشرب

و يمكن تحويل مياه الصرف الصحى لمياه شرب مره اخرى و لكن دى بتحتاج تكلفه عاليه جدا جدا لكن بتنتج مياه يمكن انضف و انقى من مياه النيل .. و لكنها غير موجوده فى مصر

يبقى كده عندنا مشكلتين
اولا تأكل شبكات الصرف الصحى و ايضا شبكات المياه بسبب عدم صيانه دوريه و تجديد مما يؤدى لاختلاط مياه الشرب بالصرف الصحى بالمياه الجوفيه

و ثانيا القاء مياه الصرف الصحى المعالجه ثنائيا و ليث ثلاثيا فى المصارف اللى بعد دورتها بتصب فى الترع الكبرى و بيتم اعادة الرى بها

و حاليا اكتشفوا ان مياه الصرف الصحى بيتم القائها فى الترع مباشرة رغم انها معالجه ثنائيا و ليس ثلاثيا


المفروض ان انشاء محطات تنقية المياه و شبكات الصرف و محطات معالجة الصرف ده شىء طبيعى جدا فى اى بلد متحضر
و كمان الصيانه و التجديد و التوسع بيبقى شىء طبيعى جدا فى اى بلد محترم

البنيه التحتيه لازم ليها كل شويه التجديد و التطوير و الاضافه و التوسع
و بتتم طبقا لخطط مؤيه و استراتيجيات و اى حكومه بتيجى بالانتخاب لازم تمشى على نفس الخطه و تكمل بدون تفاخر انها بتعمل كده لإن ده شىء طبيعى جدا

عمرنا ما سمعنا ابدا ان رئيس جمهوريه فى بلد متحضر و متقدم بيقعد يتفاخر بشبكات الصرف الصحى او محطات المعالجه او محطات المياه
الكلام ده بيحصل فى مصر بس

مبارك بيقعد يذلنا بمشروعات البنيه التحتيه اللى بيروح يفتتحها مع انها شىء طبيعى فى اى دوله فى العالم

و مؤخرا اكتشفنا انه كمان فاشل فى كده رغم ان كل دعايته و انجازاته مركزه على مشروعات البنيه التحتيه اللى هى اساسا تعتبر تطور طبيعى و فلوسها من الميزانيه اللى بندفعها أو من المعونات الاجنبيه

كل شبكات المياه اللى فى مصر عايزه تتجدد
كل شبكات الصرف الصحى عايزه صيانه

مياه الشرب فى قرى بحرى و الصعيد معظمها غير صالح للشرب
و حتى فى المدن المياه ملوثه

و شبكات الصرف الصحى فى المدن عايزه تطوير
و محطات المعالجه عايزه تطوير

و لسه فيه عشرات الالاف من قرى مصر فى الصعيد ماعندهومش اساسا صرف صحى و لسه بينزحوا الطرنشات

لسه فى صعيد مصر بل و فى داخل القاهره .. قرى لا تزال تعيش فى القرن ال 18

و خلاص الحكومه نفضت لكل مشروعات البنيه التحتيه

يا ترى مصر رايحه على فين؟؟؟

و كل واحد يخللى باله من بنيته التحتيه
احنا لينا إيه غير بنيتنا التحتيه

الثلاثاء، 12 مايو، 2009

ناقش مع شباب 6 ابريل .. رؤيتنا الشبابيه للتغيير


للتغيير فى مصر سيناريوهات عديده
و حتى الان لا يستطيع اكثر السياسيين حنكه و خبره معرفة او استقراء مستقبل مصر
و للمعادله اطراف كثيره
داخليه و خارجيه
كل طرف يسعى لكسب اكبر قدر من النقاط لدعم مشروعه او تصوره للحكم فى مصر

السيناريو الاول للتغيير هو التغيير عن طريق الثوره الشعبيه
أو التغيير عن طريق الناس
و هو ما يطرح عدة سيناريوهات فرعيه

فإذا افترضنا أنه حدث فى مصر حدث كبير
او ظرف مفاجىء
و تشبع الناس بالغليان و تحركوا فجأه
بغض النظر عن وعى الجماهير او عدم وعيهم

فسيطرح الامر سيناريوهين رئيسيين

الاول ان تقفز القوه السياسيه الاكثر تنظيما الى السلطه و قد تحتفظ بها للابد و قد يحدث تبادل بعد ذلك و الله اعلم

و الثانى ان تتحرك المؤسسه العسكريه لظبط الموقف و تتحكم فى السلطه لأجل مؤقت او دائم
و هناك بعض الاراء المطروحه حاليا من ضرورة اتحاد المعارضه للتفاوض مع المؤسسه العسكريه حين ذاك و ضمان عدم انفرادها بالسلطه .. و التفاوض حول مرحله انتقاليه و دوله مدنيه و ان يكون مهمة الجيش هو حماية الدستور الذى يعده عدد من المثقفين و الشخصيات العامه المحايده
كالنموذج التركى الذى فيه الجيش هو الحامى للدستور و الدوله المدنيه
و يختار الشعب هناك حكومات ليبراليه او اشتراكيه أو اسلاميه بدون اى تغيير للدستور او انفراد للسلطه
فالحكومات تتعاقب و تتغير و يبقى الجيش هو حامى الدستور و الدوله المدنيه

و هناك السيناريو الثانى الذى يراهن عليه بعض المفكرين و الكتاب و هو التغيير من داخل النظام
بمعنى ان يحدث استغلال للصراعات الحادثه الأن بين جناحى الحزب الحاكم من جهه
و أن يحدث استغلال للنديه القائمه بين مؤسسة الرئاسه و بعض المؤسسات السياديه من جهه اخرى

ليحدث تغيير من داخل النظام و استبدال شخصيات بشخصيات.. و ان يتم الدفع بالشخصيات المحترمه نسبيا التى داخل النظام الحالى

و من وجهة نظرى الشخصيه فإن هذا السيناريو لا اعتبره تغيير
بل هو مجرد مسكن
و ان تغيير الاشخاص لتقوم بالحكم داخل نفس المنظومه لا يمنعم تحولهم لفاسدين مثل من سبقوهم

و ان التغيير الذى ننشده ليس تغيير الاشخاص الفاسدين بأشخاص طاهرى اليد او اشخاص اقل فسادا
بل نحن نتحدث عن تغيير المنظومه بالكامل من دستور و قوانين و علاقات بين المؤسسات و عادات و تقاليد

و هناك السيناريو الثالث و هو السيناريو الاصلاحى الذى يتحدث عن التغيير السلمى عن طريق صندوق الانتخابات
و فى رأيى الشخصى اراه خياليا
لأن هذا النظام بالتأكيد لن يسمح بالتغيير و خصوصا و هو من وضع قواعد اللعبه ووضع قوانين ممارسة الحقوق السياسيه
و بالطبع لن يتخلى الحزب الوطنى عن حكمه لمصر وخصوصا و هو حريص على بقاء حالة الطوارىء و كل القوانين المقيده للحريات

و بالنسبه لهذا السيناريو الاصلاحى الخيالى هناك بعض الاصوات التى تنادى بعدم المقاطعه لتلك المسرحيات و ضرورة استغلالها جيدا للوصول للناس املا فى التغيير الحقيقى بعد ذلك والذى يقوم به الناس و هم فى حالة وعى و رغبه حقيقيه للتغيير

و هناك السيناريو الرابع الذى يراه الكثيرون هو الاقرب
بان يتم التوريث فجأه
و نجد انفسنا امام احتمالين
فإما ان يمر مشروع التوريث بسلام و بمباركه امريكيه و من باقى الاجهزه السياديه و أما حالة عجز للمعارضه و الشعب
و إما ان ترفض المؤسسه العسكريه ذلك و تقرر عزل الابن و نعود للسيناريو الاول من استيلاء على السلطه اما مطلق و اما عن طريق مفاوضات بين السياسيين و العسكريين قد تنتهى بالفشل و قد تنتهى بفتره انتقاليه و تطبيق نموذج اقرب بالنموذج التركى للجيش الذى يحمى الدستور المحايد و الدوله المدنيه حتى و ان تعاقبت الحكومات الليبراليه او الاسلاميه او الاشتراكيه


و هناك من يتحدث عن سيناريو التغيير من الخارج و نورى المالكى و الدبابات الامريكيه
و هو ما اراه امرا هزليا و مفرط فى الخياليه
فامريكا لا تحتاج للدبابات لحكم مصر
بل هى تحكم مصر بالفعل عن طريق مبارك و نظامه
ولا تريد المغامره بإستبدال مبارك الذى يحقق لها كل مصالحها و يحافظ بمنتهى الهمه و الضمير على مصالح اسرائيل و هو حامى الحمى للدوله الصهيونيه

لذلك فأنا اعتقد ان اى حديث عن التغيير من الخارج هو دربا من الهزل و الخيال المفرط الغير واقعى
لأن الخارج يهمه بقاء الوضع الحالى
و امريكا تستغل موضوع الديمقراطيه و حقوق الانسان لممارسة ضغوط اكثر على مبارك و نظامه لتحقيق اكبر قدر من المصالح لها و لاسرائيل

و انه لا يجب تجاهل ان الشعب المصرى لن يرضى بتغيير تفرضه امريكا علينا

--------------------
اما بالنسبه لشباب 6 ابريل فأعتقد اننا بحاجه ماسه للنقاش حول سيناريوهات التغيير و ما هو المقبول كليا او جزئيا و ما هو المرفوض كليا او جزئيا و ما هو المتاح

فالسنوات القادمه هى سنوات التغيير

ربما يحدث الظرف فجاه و نجد انفسنا فجأه غير مستعدون و يتم فرض علينا ما سيفرض على الشعب

و ربما تحدث الاحداث الممهده للتغيير و نتمنى ان يكون لنا دور فيها

ناقش مع شباب 6 ابريل
www.shabab6april.wordpress.com

السبت، 28 مارس، 2009

الزميل محمد الشرقاوى اليوم فى جلسة النطق بالحكم بسبب قضية نشر... فى ازهى عصور حرية النشر و التعبير


تنظر محكمة جنح قصر النيل بعابدين اليوم السبت 28 مارس،القضية رقم 4732 لسنة 2008 جنح قصر النيل، والمتهم فيها كلا من"مجدى الشافعى" مؤلف رواية "مترو"،و"محمد الشرقاوى" ناشر الرواية،بعد أن احالتهم نيابة حوادث القاهرة للمحاكمة بعد أن قام المتهم الأول(مجدى الشافعى) بتأليف كتاب"مترو" الذى يحث الناس على الخروج على نظام الحكم.. وقدمه المتهم الثانى(محمد الشرقاوى) الذى قام بطباعته ونشره وتوزيعه.."،وطالبت النيابة بمعاقبة المبدعين بموجب المواد30 و171 و178 و198 من قانون العقوبات.

و الجدير بالذكر بأن رواية مترو تعد من الروايات المصوره (كوميكس) ذات الافكار المبتكره و التى تتناول الكثير من المعاناه التى نتعرض لها فى مثل هذا النظام الحاكم و بها عبارات تدعوا للايجابيه و التحرك لازالة النظام المستبد

و الجدير بالذكر ايضا بأن تم اقتحام دار ملامح للنشر و مصادرة الروايه بعد حبس الزميل محمد الشرقاوى على خلفية يوم 6 ابريل 2008 حيث تم اعتقاله من امام منزله صباح يوم 6 ابريل 2008 اثناء توجهه لميدان التحرير للمشاركه فى التظاهرات التى كان من المفترض القيام بها
و ان ما يحدث له يعد عقوبه من جهاز مباحث امن الدوله التى اعتقلته و اعطت الاوامر لمباحث المصنفات بمصادرة الروايه ثم استمرت القضيه التى سيتم الحكم فيها اليوم بصوره عاجله

و اعلن تضامنى التام مع صديقى العزيز و رفيق الزنزانه فى 2006 "محمد الشرقاوى" ضد ما يتعرض له من متاعب بسبب معارضته لذلك النظام المستبد

الجمعة، 13 مارس، 2009

6 ابريل 2009 .. لماذا؟؟؟

بعد انتهاء عام 2005 و احداثه السياسيه المتلاحقه بدأت مرحله من الخمول السياسى النسبى بدات فى التصاعد بعد إعتقالات أحداث القضاه فى منتصف 2006 و إحكام القبضه الامنيه مره أخرى .

و بعد عدة محاولات من قوى معارضه مختلفه للنزول للشارع مره أخرى و اعادة التواصل مع الجماهير تزامنت مع خروج العديد من التحليلات التى تصب فى فكرة تصحيح مسار قوى المعارضه الوطنيه و ضرورة الإتصال الحقيقى مع الجماهير.و لكن احكام القبضه الامنيه و غياب الخريطه الموحده لقوى المعارضه ساهم فى صعوبة المهمه كثيرا.

و فجأه ظهرت الإحتجاجات الإجتماعيه فى 2007 التى رغم انها أحد نتائج الحراك السياسى فى 2005 إلا أنها كانت الملهمه لكثير من القوى السياسيه الوطنيه.. و كانت بمثابة الأمل لكثير من السياسيين بأن هذا الشعب الذى ينتفض من أجل المطالبه بحقوقه البسيطه و لو كانت اقتصاديه و إجتماعيه و لكنه حتما سينتفض يوما ما من أجل المطالبه بحقوقه السياسيه الضائعه.

و فى نهايات 2007 ظهرت دعوة عمال المحله للقيام بإضراب عام فى مصنع غزل المحله إن لم يتم الاستجابه لمطالبهم.. و تلقف العديد من النشطاء هذه الدعوه و فكروا فى تطويرها لإضراب عام لشعب مصر,و اتفقت العديد من القوى السياسيه على فكرة اضراب عام لشعب مصر.

و قد كان للقوى السياسيه الوطنيه سابق تجربه فى الدعوه لاضراب عام فى 23 يوليو 2007 و لكنها لم تنتشر بالقدر الكافى .

و قد كان لنجاح دعوة اضراب 6 ابريل 2008 و الاستجابه الغير متوقعه التى حدثت العديد من العوامل و الاسباب أهمها و ابرزها هو حالة الاحتقان الشديد التى كانت متوفره لدى جميع طوائف الشعب بسبب الغلاء المهول فى الاسعار و ثبات المرتبات و العشوائيه المفرطه فى اتخاذا القرارات.. بالاضافه لوجود الشباب الذى استجاب لدعوه الاضراب و بدأ فى تطويرها و نشرها بجميع الوسائل الحديثه و التى كان أهمها هو موقع الفيسبوك الشهير.

و لو نظرنا للاوضاع الحاليه فسنجد ان الظرف الموضوعى لا يزال مستمرا و فى ازدياد, فلم تنخفض الاسعار كما وعدت الحكومه , و لا تزال المرتبات فى القطاع العام و غالبية القطاع الخاص لا تفى بالاحتياجات الضروريه , و لم تنخفض اسعار الوقود فى مصر رغم انخفاضها فى العديد من دول العالم,و لا يزال اسوق فى مصر يعانى من الفوضى و الاحتكار لصالح افراد قلائل, و لا تزال حكومة الحزب الوطنى تفشل فى حل ابسط المشكلات و لا تزال العشوائيه و الفوضى هى المسيطره على جميع القرارات الحكوميه.

بالاضافه لتاثيرات الازمه الاقتصاديه العامليه و موجة عودة العاملين المصريين فى الخارج و موجة التسريح المفاجىء التى انتشرت فى القطاع الخاص المصرى نتيجه لعدم الالتزام بقانون العمل بسبب غياب الرقابه.

و بالطبع لم تحدث اى اصلاحات حقيقيه طبقا للوعود لا فى الحكومه الحاليه و لا فى الحكومات السابقه.. بل و لن تحدث اى اصلاحات فى الحكومات القادمه التابعه لنفس الحزب و نفس المنظومه.

فالحزب الوطنى و حكومته و نظامه لا يرغب فى اى اصلاح حقيقى, بل هى مجرد مسكنات لإبقاء الوضع على ما هو عليه .

و لكن لماذا 6 ابريل 2009؟؟؟

لو اعتبرنا ان يوم 6 ابريل 2008 هو خطوه اولى لحدث جامع شارك عشرات الآلاف من الشباب الغير منتمى لتيارات سياسيه فى نشره, و استجابت له العديد من الشرائح و الفئات.

و لو اعتبرنا أن 6 ابريل السابق خطوه هامه و كبرى فى المشوار الطويل للتغيير و خطوه هامه فى مشروع ايقاظ الشعب من غفوته و إعادة الايجابيه للشباب المصرى.

و لو علمنا حقيقة ان الإضراب السابق لم يكن هدف فى حد ذاته و إنما وسيله لنشر ثقافة الاحتجاج السلمى و تشجيع الناس على المطالبه بالحقوق المشروعه .

فإن 6 ابريل القادم هو الخطوه الثانيه المكمله للتراكمات التى حدثت منذ بدايات 2005, و يمكننا ان نعتبره انه الخطوه الثانيه الكبرى فى مشوار إعادة ايقاظ الشباب المصرى و تجميعه على مطلب واحد , و الخطوه الثانيه فى مشروع اعادة بعث روح الايجابيه و الانتماء فى الشباب المصرى.

ولا تزال الظروف التى سببت الإحتقان و الغليان موجوده و فى ازدياد مستمر , و بالطبع لن تزول لأن الحزب الوطنى و نظامه ليس لديه رغبه جديه فى اصلاح حقيقى.

و لابد من التراكم و البناء على ما حدث فى الاضراب السابق و تطوير الفكره و تحديثها و تجنب السلبيات التى حدثت سابقا.

و هناك بالطبع بعض الانتقادات الموجهه لفكرة الاضراب السنوى و الحدث الموسمى, و لكن لو نظرنا لبعض التجارب المشابهه فى الدول التى استطاعت تغيير الانظمه المستبده فسنجد ان فى شيلى مثلا كانت الدعوه للاضرابات و الاحتجاجت موسميه و متكرره و مبتكره مما ساهم فى الاستجابه الشعبيه الواسعه التى ساهمت بعد ذلك فى تغيير النظام المستبد الذى كان يحكم البلاد بالحديد و النار بعد سنوات عديده من الاحتجاجات و الائتلاف و المقاومه السلميه و التصميم على النجاح.

و هناك العديد من التجارب التى حدثت فى السنوات السابقه و التى كانت تعتمد اعتماد اساسى على فكرة حرب اللاعنف و استراتيجيات التغيير السلمى و نشر ثقافة الاحتجاجات و الاضرابات السلميه إلى ان تنفض الشعوب الخوف عن نفسها و تغير واقعها بنفسها.

و لو نظرنا للعام الماضى فسنجد أنه عام 2008 و بداية 2009 هى فترة تصاعد الاضرابات و الاحتجاجات الفئويه و ازديادها ربما على خلاف المتوقع.

فقد توقع العديد من المحللين السياسيين أن بعد اضراب 6 ابريل 2008 لن يكون هناك اضرابات اخرى و أنه تم ضرب الحركه العماليه فى مقتل.

و لكن الواقع العملى يشهد بغير ذلك ,.. فالاضرابات و الاحتجاجت السلميه فى ازداياد مستمر.. بل أن المفاجئه هو تحول العديد من المطالب الاجتماعيه للعديد من الفئات لمطالب سياسيه فى المقام الأول. ترسيخا للقاعده القائله بأنه لا فصل للمطالب السياسيه عن المطالب الاجتماعيه و الاقتصاديه.

و يوم 6 ابريل هو فرصه عظيمه ليوم جديد لتوحيد كلمة الشعب .. بأن تتحد كل الفئات التى تطالب كل يوم بحقوقها على يوم واحد لإعلان الإضراب السلمى العام حتى تتحقق لكل فئه مطالبها سواء بفك الحراسه عن النقابات أو الكادر أو الارباح أو البدلات أو رفع المرتبات أو خفض الضرائبى الغير مدروسه أو أى مطالب إقتصاديه أو اجتماعيه مشروعه.

بالاضافه لاضراب الطلاب لتحقيق مطالبهم الطلابيه التى اعلنوها فى يوم 21 فبراير الماضى من تحسين مناهج واحوال التعليم الجامعى و خفض اسعار الكتب الجامعيه و المصروفات و خروج الحرس الجامعى تنفيذا لاحكام القضاء و الغاء الائحه الطلابيه الحاليه التى دمرت نظام التعليم المصرى.

بالاضافه لمطالب عامه تهم كل الفئات المصريه من حد أدنى للأجور و ربطها بالاسعار و إجرائات حقيقيه لضبط السوق ووقف الفوضى.

ولا يوجد ما يمنع من ان يشمل اليوم العديد من الانشطه و الافكار.

فبجانب الدعوه للاضراب عن العمل او الدراسه أو الشراء إحتجاجا على تردى الأوضاع الاقتصاديه , لا يوجد مانع من أى دعوات سياسيه تصب نفس الهدف المطلوب.

بل ان الدعوه للإضراب العام يوم 6 ابريل من الممكن أن تكون بدايه حقيقيه للإتلاف بين جميع القوى السياسيه و العمل الموحد الذى يليه مزيد من التعاون على انشطه موحده.

أما بالنسبه للتخوف من الفوضى أو اى اعمال عنيفه فهى بالطبع تخوفات مشروعه و لكننا نؤكد على سلمية الدعوه و سلمية الاحتجاج و نشدد على وزارة الداخليه بان تمارس دورها الحقيقى بحماية المنشئات و الممتلكات فقط و ليس مهاجمة الجماهير التى تقوم بالاحتجاجات السلميه المشروعه لأن البدء بالعنف و القمع لا يولد سوى رد فعل عنيف .. و الضغط يولد الإنفجار.

اما نحن .. فبالطبع لن نتوب عن حب الوطن .. و بالطبع لن نتوب عن حلمنا بتغييره بكل وسائل المقاومه السلميه.

لنجعل يوم 6 ابريل 2009 هو يوم جديد لإتحاد كل الفئات على فكرة المطالبه بالحقوق المشروعه.

لنجعل يوم 6 ابريل 2009 هو بداية الائتلاف الحقيقى بين كل القوى السياسيه الوطنيه.

ليكن شعارنا يوم 6 ابريل القادم هو … حقنا و هناخده

شباب 6 ابريل

شباب حر

شباب بيحب مصر

الخميس، 5 فبراير، 2009

الرساله الاولى و الاخيره للمقدم محمد سعيد من مباحث امن الدوله.. عيب .. احنا مش بناكل من الكلام ده

فيه ظابط فى امن الدوله اسمه المقدم محمد سعيد.. أو ايا كان اسمه علشان كلهم بيستخدموا اسماء حركيه.
المهم الظابط ده يقال عنه انه محترم
و لكنه فى الفتره اللى فاتت بيتصل بوالد واحده زميلتنا نشيطه فى الحركه باستمرار و عايز يقابله مقابله وديه للنقاش
طبعا الاسلوب ده قديم و معروف خصوصا مع البنات.
الظابط يتصل بأهل البنت و يطلب يقابلهم و ساعات الظابط يكتفى بالتليفون فقط و يبدأ النقاش بالشكر و المدح و محاضره عن المعارضه المقبوله و المعارضه غير المقبوله .. على شوية ضحك او هزار و يبدأ زى بنتك ليه مع العيال المجانين دى.. و ده غلط .. و كده ممكن تأذى نفسها .. و إحنا خايفين عليك و عليها.. و انا بكلمك زى اخوك الكبير أو الصغير"حسب عمر الظابط و عمر الأب".
و احيانا الظابط بيرمى كل ورقه و يظهر الوش التانى فى أول قعده و احيانا بيأجله لو أول حوار ماجابش نتيجه.
و الوش التانى بيبقى عباره عن تهديد زى إحنا ممكن نبهدلك و نبهدلها.. و ممكن نضيعهالك فى لحظه و مالهاش عندنا ديه .. و محدش هاينفعها ولا هاينفعك و ممكن نعمل و نسوى و .. و..و..

ده الاسلوب المتبع بالضغط على اهالى البنات و استغلال خوف الاهل على عيالهم
فى بعض الحالات القليله خصوصا لو كانت البنت جديده.. الاهل بيضغطوا ضغط جامد و بيحاصروا البنت حصار عنيف و فى الاخر البنت بتبعد عن السياسه
و الاغلب الاعم الأهل بيضغطوا و البنت بتتصادم معاهم أو بتهدى لفتره و بتكمل بعدها تانى لأنها مقتنعه إنها مش بتعمل حاجه غلط و مقتنعه بالقضيه
و فى حالات اخرى تلاقى الاهل هما كمان مش خايفين و بيدخلوا شمال فى الظابط و بيقطعوا اى اتصال معاه.. لأنهم بيبقوا فاهمين إن كل ده تهويش و ضغط نفسى.. و ان بنتهم فعلا بتعمل حاجه كبيره و مش بتعمل حاجه غلط.

نرجع تانى للمقدم محمد سعيد
احنا بنسمع انك محترم... مجرد سماع
بس هل فيه ظابط محترم بيهدد اهل بنت لانها بتقول رأيها فى نظام الحكم اللى بيتعب اهلك زى ما بيتعبنا.
ممكن دى تكون اوامر من رئيسك... لكن هل ده يصح؟
هل تقبل إننا مثلا نفضحك قدام مراتك او اهلك أو نتصل بأى حد منهم ؟؟
هاتبقى فرحان مثلا لما يتعمل بلاغ ضدك انك بتهدد الناس بصوره غير قانونيه..و تتنشر صورك فى الجرايد و يبقى منظرك بايخ قصاد ولادك و معارفك و اهلك و قرايبك ؟؟
بالتاكيد لأ .. .. و رغم ان فيه حاجات كتييييييير مجنونه ممكن نعملها و احنا يا عم مش هانبدأ بالعداوه ... خلينا محضر خير

فنصيحه وقف اتصالاتك مع اهل البنت علشان مش هاتجيب اى نتيجه .. و اذا كان الراجل الطيب ساكت و بيرد عليك باحترام .. فده مش معناه انه خايف منك.
اقولك
قول للعميد أحمد السيد أو ايا كان اسم اللى مكلفك بالاتصال ان المحاوله فشلت .. و اطبعله الرساله دى و قدمها فى تقريرك
احنا مابناكلش من الكلام ده
عيب

الثلاثاء، 3 فبراير، 2009

اعلن انضمامى لحركة مدونون من أجل الارهاب .. الحريه لمحمد عادل


كان أول مره اعرف فيها محمد عادل فى جروب شباب من اجل التغيير على الياهو فى صيف 2005
كان مصدع دماغنا بدفاعه عن الاخوان.. كل يوم خناقات و نقاش معاه.. و فى يوم كان فيه حد استفزه علشان ينزل معانا مظاهرات و يخرج عن طوع الاخوان.
و فى الاخر اتفاجئنا بطفل صغير بيقول انا محمد عادل
و كانت الدهشه و البلاهه على وجوه الجميع.. انت؟؟
انت عندك كام سنه يابنى؟؟ .. و لما قال انه عنده 16 سنه و داخل فى ال17 .. فيه ناس مننا جاتلهم تشنجات من كتر الضحك لسه ملازماهم لغاية دلوقتى.
بقى انت اللى مجننا و خانقنا على النت... انت؟
و بعد كده بفتره لاقيناه راشف فى أى حاجه.. اى موضوع تلاقيه موجود فيه.. و عرفنا بعدها انه مش عضو فى الاخوان كعضو تنظيمى.. و لكن ليه وجود و صلات كبيره بكوادر و شباب كتير منهم.. و كمان هو من بيت اخوانى
و لكن الحمدلله لم يؤثر قربه من الاخوان على تصرفاته بصفه عامه... و خصوصا اننا عرفنا ان عصبيته الغريبه اللى بتطلع فجاه و تختفى فجأه دى طبع فيه اساسا مش لانه اخوان ولا حاجه.

و فى اعتقالات القضاه فى صيف 2006 لقيته داخل عليا السجن فى احد الايام و هو مبتسم ابتسامته البلهاء
قولت فى نفسى .. ييييييييييه .. يعنى الواحد داخل السجن علشان يستريح و يهدى اعصابه.. يقوم يجيله جوه السجن محمد عادل.. انت ايه اللى نزلك مظاهرات يابنى... مش فاكر وقتها كان رده ايه .. بس هو عموما لما بيتعصب بيبتسم و يقول عايز ايه ياض.. مش عاجبك ولا ايه.. على شوية خبطات فى الكتف او لكمات فى الفكين على سبيل الهزار الحميم.

و طبعا لا يمكن انسى انه كان ماسك الإعاشه جوه السجن و كان بيصادر اى اكل او مستلزمات بتيجى من اهالينا او من لجان الاعاشه.. و يوزعها على الكل بعد كده بالقطاره ..و كان مجوعنا و منشفها علينا خصوصا فى السجاير.
المهم نخرج من السجن و تمر الايام و ابص الاقى محمد عادل فى كل حته.. فى اى مظاهره أو مؤتمر او ندوه او اجتماع... لدرجة انى ساعات كنت بخاف انى افتح الحنفيه و الاقى محمد عادل نازل منها.

حتى فى شباب 6 ابريل.. رغم عدائه لتلك الحركه الوليده كمعظم المدونين... و رغم التريقه اللى كان بيقولها فى السر والعلن.. لكن برضه كنا بنلاقيه بيشارك فى معظم انشطتها و بيدعمها بقوه و ينشر الاخبار و يساعد فى اى حاجه محتاجينها.
بصراحه.. انا اكتشفت انى بحب محمد عادل جدا.
و اكتشفت انه واحشنى جدا و انه كان حد طيب و محترم و صافى رغم غلاسته .
و اعتقد ان محدش يقدر ينكر إن محمد عادل راجل فى قمة الجدعنه و الاخلاص لقضية التغيير

مش عارف ازاى المتخلفين بتوع امن الدوله عملوله قضيه تافهه زيهم علشان يعطلوه عن دعمه لغزه و قوافل فك الحصار
قضيه تافهه عملها ظابط تافه ان دلت على شىء فإنما تدل على تفاهة الجهاز المسمى بمباحث امن الدوله.. و انه جهاز بارع فقط فى حماية لصوص الحزب الوطنى بكل الوسائل الغير قانونيه و الغير مشروعه
و بما انهم تافهين.. و بما اننا مجانين... فقد قررت و أنا بكامل قواى العقليه أن انضم لحركة مدونون من أجل الارهاب..

و زى ما هو اتمسك بسبب انه متصور فى غزه بسلاح فشنك.. و لفقوله بسبب الصوره الطفوليه دى قضية الانضمام لتنظيم مسلح و تلقى تدريبات عسكريه
و اخيرا قدرت اجيب حتة سلاح خرز علشان اقدر انضم للتنظيم الجديد... و يمكن يضمونا للقضيه التافهه بتاعة محمد عادل و أخد أجازه من الشغل و اريح اعصابى شويه فى السجن

و اعلن كامل ولائى للتنظيم و انى مستعد لتنفيذ أى عمليه يتم تكليفى بها
و جارى اعداد عشرة الاف مقاتل ابريلى مستعدون للتضحيه بكل ما يملكون من خرز فداء لمحمد عادل


أحمد ماهر
عضو بحركة مدونون من أجل الارهاب



الاخوه المجاهدون

الملا وائل عباس امير المدونين

www.misrdigital.com

اسد

http://www.asadx.net/

مواطن مصرى واخد على قفاه

http://www.egymasr.com/?p=441

الحاج جرجس

http://egyptwatchman.blogspot.com/2009/02/blog-post.html

السبت، 24 يناير، 2009

ردا على مقالة حمدى رزق بالمصرى اليوم

الكاتب الفاضل حمدى رزق
فى مقالك المنشور يوم 18 يناير الماضى بجريدة المصرى اليوم كان لك بعض التساؤلات عن من هم شباب 6 ابريل و الى ماذا يهدفون و ما موقفهم من الدوله المدنيه..و تسائلت عن مشروعيتهم السياسيه و من هى القوى السياسيه التى شاركوها الدعوه لاضراب 6 ابريل الماضى.. و ما علاقتهم بالاخوان.. و فى نهاية المقال لصقت بهم تهمة الفوضى و التخريب و حملتهم دم ضحايا المحله الابرياء.
و لكنك لو عدت بذاكرتك للوراء و طالعت ما تم نشره فى العديد من الصحف المستقله قبل و بعد اضراب 6 ابريل الماضى لعلمت ان هناك بعض القوى السياسيه التى اتفقت على جعل يوم 6 ابريل الماضى يوم لاضراب عام سلمى فى مصر للاحتجاج على الاوضاع المتدهوره.. من بينها على سبيل المثال لا الحصر حركة كفايه و حزب الغد و حزب الجبهه وحزب العمل و حزب الكرامه و الحزب الناصرى و حزب الوسط و العديد من الحركات و التجمعات الاخرى.. و لم يكن بينهم بالطبع جماعة الاخوان المسلمون التى رفضت الدعوه للاضراب نتيجه لحسابتهم السياسيه حيث كان فى هذا الوقت الجلسات النهائيه للمحاكمات العسكريه لبعض قيادات الاخوان.. و قد تلقف بعض الشباب من النشطاء السياسيين الدعوه و قاموا بتطويرها و تعديلها ونشرها على اوسع نطاق بالعديد من الوسائل من بينها موقع الفيسبوك الشهير و قد أدى ذلك لانتشار الدعوه على نطاق واسع.
و لعلك تتذكر ان جماعة الاخوان المسلمون تبرأت من دعوة الاضراب قبل 6 ابريل فى بيان شهير ثم دعمت دعوة احتجاج 4 مايو شكليا بدون مساهمه حقيقيه.
أما اذا كان المقصود من المشروعيه هو صكوك الغفران التى تعطيها لجنة شئون الاحزاب التى يرأسها الحزب الوطنى للمعارضه المستأنسه.. فبالتاكيد يختلف تفسيرنا للمشروعيه عن تفسير سيادتكم.
و للتذكير مره أخرى فاننا شاركنا الدعوه للاضراب لبعض القوى التى تحمل مشروعية لجنة شئون الاحزاب و لم يشارك الاخوان فى الدعوه لاضراب 6 ابريل الماضى و هذا معلن و تم نشره فى العديد من الصحف.
أما بالنسبه لمن هم شباب 6 ابريل و ما هى افكارهم و إلى ماذا يهدفون.. فقد كانت الإجابه على هذا التساؤل سهله جدا و موجوده على الكثير من المقالات و الانشطه على موقعنا.. و نحن حاليا بصدد تجهيز صياغه واضحه توضح افكارنا و رؤيتنا و اهدافنا.
و لكن للتسهيل أيضا يمكننى قول ان شباب 6 ابريل هم الشباب الذى يعانى من سوء الاوضاع فى مصر.. هم الشباب الذى يجنى ما زرعته الأجيال السابقه سواء كانوا حكومه أو معارضه أو أهالى مستسلمون للواقع الأليم..هم الشباب الذى يجنى ثمار الديكتاتوريه و القمع و حكم الفرد الواحد.. هم الشباب الذى يعانى بسبب المنظومه التعليميه العقيمه.. هم الشباب الذى ينتظر لسنوات من اجل الحصول على وظيفه تفى بالكاد مصروفات مواصلاته.. هم الشباب المنتشر على المقاهى فى انتظار فرصه او ربع فرصه .. هم الشباب الذى رفض الهروب والهجره من هذا البلد حتى لو كانت النتيجه هى الموت غرقا بحثا عن فرصة عمل .. و لا تحدثنى عن القنوات الشرعيه للتعبير عن الرأى.
فأنت تعلم جيدا كم السيطره الأمنيه على كل مجريات الأمور فى هذا البلد.. و تعلم جيدا أن معظم هذه الأحزاب الرسميه الشرعيه من وجهة نظرك ما هى إلا ديكور ساذج أو أخرون قلائل لا حول لهم ولا قوه مستسلمون للتعليمات الأمنيه الصارمه.
و لا نختلف فى مطالبنا عن معظم الأفكار الموجوده من اتاحة الحريات السياسيه و حرية تكوين الاحزاب وإقامة حياه ديمقراطيه سليمه حقيقيه و دستور جديد جامع متفق عليه من الجميع بدون أى ايدلوجيات او صبغات و فتره انتقاليه و التأكيد على مبدا الدوله المدنيه.. و الاهم هو إرساء مبدأ الحساب لكل المقصرين و ان نكون فعلا دولة مؤسسات و ليس على الورق فقط.

ولا تحملنا ما لا طاقة لنا به.. فلسن نحن من أشعل المحله .. و لو بذلت مجهود اكبر فى البحث عن المعلومه لاكتشفت ان من قام بالاحتجاجت العفويه هناك هم أهالى المحله البسطاء الذين لا تكفى دخولهم ثمن العيش الحاف الذى يبذل المرء مجهودا عظيما للفوز به .. و إن طالعت التغطيات و التحليلات وقتها لعلمت انه تم حبس عمال المحله داخل مصنعهم منذ ليلتها و تم اعتقال قادة الإضراب العمالى.. و فى الصباح خرج الأهالى البسطاء فى احتجاج عفوى يطالبون بلقمة العيش.. و كعادة حكومة الحزب الوطنى و جهازها القمعى المسمى بجهاز امن الدوله انهمر الرصاص المطاطى و قنابل الغازعلى الاهالى.. و رد الاهالى بالحجاره و ردت قوات الامن بالرصاص الحى.. و شوهد الامن يستعين بسلاح البلطجيه الشهير لايجاد مبرر للقمع المفرط و هو السلاح الذى اثبت جدواه فى الانتخابات البرلمانيه و اثبت جدواه فى قمع المعارضه المصريه فى احداث كثيره سابقه.
سيدى العزيز نحن لا نبحث عن الفوضى.. بل نحن من يحاول انقاذ مصر منها.
فلا تنسى بأن الضغط هو ما يولد الانفجار.. ولا تنسى أن هناك حالة من الضباب تحيط بمستقبل مصر و الاوضاع كل يوم تزداد سوء.. ولا توجد حتى الان كيانات معارضه منظمه تستطيع منع الفوضى فى حال المفاجئات.. فالحزب الوطنى و جهازه الامنى اجهز على كل الكيانات و القوى و كل مكونات المجتمع المدنى الحر.
يا سيدى الفاضل إن الاحتجاجات ستتوالى بنا أو بدوننا.. و الاحتجاج و الإعتراض حق مشروع.
فأحرى بك أن توجه نصيحتك لوزارة الداخليه أن تمارس دورها الحقيقى.
للحمايه من الفوضى سواء فى احتجاج 6 ابريل القادم او ما سيتم بعده منا او من غيرنا وجه نصيحتك لوزارة الداخليه ان يكون دورها هو دورها الطبيعى فى حماية المنشئات و الممتلكات فقط لا غير.
إنصحهم ألا يستخدموا القمع المفرط كما تعودا.. فالحلول الامنيه لا تحل شيئا و انما تعمق المشكله و تكرس للفوضى المفاجئه.
إنصحهم أن من حق هذا الشعب الإعتراض على الاوضاع التى تزداد سوء.. و ان يكون دور الشرطه هو الحمايه و التنظيم فقط لا غير.. لأنه طالما بقيت الأوضاع السياسيه و الاقتصاديه و الاجتماعيه فى تدهور فستزداد الاحتجاجات بنا أو بدوننا.. و نحن حريصين على سلميتها أكثر من أى احد أخر.
و قد كانت النيه فى الاضراب السابق هى التعاون و تجنب اى احتكاكات مع الامن.. بل و كنا على استعداد للقبض على المشاغبين و تسليمهم للامن.. و لكن الامن هو من بادر بالاعتقالات و القمع فأدى لتدهور الاوضاع.

انصحهم بالله عليك حماية لمصر من الفوضى