الأربعاء، 5 نوفمبر، 2008

رساله لظباط امن الدوله .. هل فعلا مصدقين نفسكم انكم بتحموا الوطن؟؟؟؟

الى الظباط الذين يعملون فى جهاز يسمى زورا امن الدوله
يمكن دى الرساله رقم 3 اللى اكتبها دلوقتى... الاولانيه كان فيها سخريه شديده .. و التانيه كانت بالفصحى فقولت بلاش علشان الترجمه
لكن بقالنا فتره بنلعب مع بعض لعبة القط و الفار
حضرنا لمؤتمر يفضح الحزب الوطنى اللى بتحموه .. و منعتوه على ارض الواقع... لكن بالطبع مش هانسكت .. عملناه برضه على النت و وصلنا كلامنا لكل مكان و كنا احنا السباقين بالخطوه دى و حركنا ناس كتير كبار غاروا مننا و هايعملوا زينا و ان شاء الله احسن كمان
منعتونا فى جامعة عين شمس .. لكن نجحنا فى القاهره و حلوان و فضحنا الحزب الوطنى و كان كم التعاطف معانا كبير جدا بين الطلبه و اثبتنا نفسنا هناك
منعتونا من الاحتفاليه على الكوريش .. لكن نجحنا اننا ننفذها فجأه فى الازهر بعدد كويس برضه و الناس اللى حوالينا كانوا فرحانين بينا و مننا
تفتكروا مين اللى كان خايف
احنا؟ظ
و لا انتوا اللى حاصرتم حديقة الازهر بالعدد المهول من القوات الجراره علشان تمنعوا شباب بيغنوا فى حب بلدهم

طب نتكلم شويه بصراحه؟؟
هل انتم فعلا مقتنعين انكم بتحموا البلد؟
و من مين
مننا؟؟
انتوا عارفين كويس اننا شباب نضيف لا بناخد اوامر من حد ولا تبع حد
و عارفين كويس جدا اننا بالفعل نفسنا ننقذ مصر
انتوا عارفين كويس اننا غير ناس كتير كبيره و اسمهم لامع بيشتموكوا الصبح و يتصلوا يقولوا التقارير بالليل

و برضه عارفين كويس انكوا بتضحكوا على نفسكم لما بتقولوا على نفسكم انكم جهاز وطنى بيحمى مصر من الفوضى
لإنكم عارفين كويس انكم مش بتحموا مصر .. انتوا بتحموا الحزب الوطنى .. و عارفين اكتر مننا انه الحزب اللى خرب مصر و اللى هايودى مصر للفوضى
بس انتوا بتحاولوا تقنعوا ضميركم بكده
طبعا بسبب المرتبات و الامتيازات و السلطه المطلقه اللى بتخيلم بالفعل تحكموا البلد
و الاهم انكم عارفين اننا مش عايزين فوضى
كان فيه ظابط امن دوله انهارده كلمنى فى الحصار اللى تم ليا على الكورنيش
ما اخدتش بالك انى ماسلمتش عليك و سلمت على ظابط المباحث؟؟
سألت نفسك ليه؟؟
ظابط المباحث اتكلم معايا بإحترام و ذوق .. فسلمت عليه وانا ماشى
انما انت بتتكلم معايا من طرف مناخيرك و بعنجهيه و غرور كانك إله
طبيعى اتجاهل وجودك اساسا
بس انت عرفتى اهم حاجه انهارده لما سألتنى فين عربيتك
عرفت انك كنت معاهم فى الحفله اللى كانت عليا فى لاظوغلى فى 7 مايو
اهم حاجه انهارده انى شوفتك و سمعت صوتك اللى سمعته قبل كده هناك و انا متغمى
صدقنى مش هنساك ابدا ... بالتاكيد
انا عارف انك راشق معانا على الجروب
و الاهم من ده كله ليا كام سؤال
و انت مشترك مع باقى البشاوات فى الحفله اللى كانت عليا عندكوا
كنت بجد مقتنع من جواك انك بتخدم الوطن؟؟
انهى وطن؟؟
لما هجمتوا انهارده على الجنينه بجيش يحرر القدس علشان تمنعوا شباب انهم يقولوا تحيا مصر
هل كنت برضه بتخدم مصر؟؟
يا ريت تعترف من جواك انك بتخدم الحزب الوطنى
ياعنى بتخدم شوية حراميه و لصوص بينهبوا الوطن
بلاش تضحك على نفسك

اعترف علشان يبقى اللعب على المكشوف

و اكيد طبعا مش بكلمك لوحدك
الكلام لكل ظباط امن الدوله اللى بيضحكوا على نفسهم و بيضحكوا على اهاليهم و بيقولوا احنا بخدم الوطن
اكيد انت مبسوط بالامتيازات اللى انت فيها
لكن اكيد ليك اهل او قرايب بيعانوا زينا
حاول تفكر بهدوء بينك و بين نفسك ... حاول تنسى الاوامر شويه

عموما لسه الايام جايه كتير
انهارده على فكره كسبنا الماتش 3 لينا و 2 ليكوا
و لسه الدورى شغال

اكيد طبعا انهارده تعبتوا مننا و اتخنقتم من متابعتنا فى كل حته و اللى منكم ساب مراته و اللى منكم ساب ولاده و ده طبيعى جدا..احنا مش مطالبين نسهر على راحتكم
على الاقل انتوا اخدتم بدل .. ابسط يا عم
احنا بقى دفعنا من جيوبنا و بنهمل بيوتنا و اهالينا

و انتوا بتأدوا وظيفتكم فى حماية الحزب الوطنى
و احنا برضه هانؤدى وظيفتنا فى حماية مصر

هناك 3 تعليقات:

Sharm يقول...

صدقت

TAFATEFO يقول...

كنت عايز ايميل حضرتك أو موبايلك لو ممكن .. كنت عايز أقول لحضرتك على حاجه وأسأل على حاجه

لو ممكن

ايميلي tafatefo007@hotmail.com

موبايلي 0122922212

أو رد علي هنا أو في أي حته بعد اذنك

أنا المستقبل والأمل يقول...

ياشعب مصر لقد تأخر عصر الحياة الكريمة طويلاً وإن لم نبدأ في المطالبة بتطبيق وثيقة المستقبل والأمل من الآن فإن هذا النظام الديكتاتوري الحالي أو إمتداده سوف يتمادى في غيه وظلمه وفي هذه الحالة لا نلوم أحد سوى أنفسنا ولذلك يجب أن نوحد كل الجهود والأهداف وعدم الإنصات إلى الأحزاب الوهمية التي تتصيد المواقف. ياشعب مصر لقد بدأنا فكرة الإعتصام المدني بكم فلنجعلها تستمر مرة أخرى وبكم فالرجاء عدم الإلتفات إلى الأمور الجانبية والهامشية وإلى كل من يريد أن ينسب لنفسه فكرة الإعتصام المدني لأنها ببساطة فكرتنا وليست فكرة إسراء أو جماعة ٦ أبريل أو مجموعة الفيس بوك (راجع مدونة وائل عباس الوعي المصري وتحديدا في بوست صور قتيل جزاري الشرطة الطفل يوم ١٥ أغسطس عام ٢٠٠٧)

ياشعب مصر لابد وأن نبدأ إعتصام مدني آخر ولابد وأن يستمر إلى أجل غير مسمى وأن نتكاتف جميعاً حتى يتم تحقيق المبادئ الأساسية من وثيقة المستقبل والأمل والتي
نلخصها في النقاط الخمس الآتية
١) الإفراج فوراً عن كل المعتقلين السياسيين وخصوصاً من أمرت النيابة بالإفراج عنهم ولازالت وزارة الداخلية تتخذ منهم رهائن ومحاسبة كل المسئوليين الذين خالفوا أحكام القانون والدستور وفوراً

٢) إنهاء كل القوانين الإستثنائية والعسكرية من تطبيقها على المدنيين والحد من سلطات العسكريين وأجهزة الشرطة في الحياة المدنية

٣) البدأ فوراً في تكوين لجنة عليا من أساتذة القانون أوالقضاة أو منهما معاً لإعادة أو بداية كتابة وصياغة دستورالدولة ولا يكون أحدهم يعمل أو سبق له العمل في أي حزب من الأحزاب القائمة أو السابقة وذلك لوضع ضوابط ومواصفات وشروط ترشيح أو إقالة رئيس الدولة ونائبه وضوابط الهيئة البرلمانية والهيئة القضائية العليا وتحديد سلطات وإختصاصات كل هيئة بما فيها رئيس الدولة وعلى ألا تزيد فترة الرئاسة عن فترتين بحد أقصى ولا يجوز أن تجدد أو تمد بأي حال من الأحوال

٤) تكون هذه اللجنة هي النواة للجهة القضائية العليا
(Supreme Court)
وتكون ذات عدد فردي (خمسة أو سبعة مثلا) حتى لا تتعادل الأصوات عند التصويت على أمر ما

٥) لابد وأن يكون هناك إشراف دولي عن طريق الأمم المتحدة أو إحدى منظماتها للمراقبة والإشراف على سائرالعمليات الإنتخابية نظراً لإنهيار الثقة في أي نظام داخلي محايد

الرجاء من كل المصريين نساءاً أو رجالاً شباباً كانوا أم شيوخاً في داخل مصر وخارجها نشر البنود السابق ذكرها من وثيقة المستقبل والأمل وإعادة طباعتها وتداولها عن طريق البريد الإلكتروني وأجهزة المحمول وجميع مواقع الإنترنت لتوحيد أهدافنا ومطالبنا ونرجو أن تعلق على البلكونات والجدران طوال أيام الإعتصام المدني مع كتابة عبارة طبقوا وثيقة المستقبل والأمل

حينما يبدأ الإعتصام المدني الرجاء من الجميع الكف عن السلبية والأخذ في الإعتبار الآتي
١) عدم الخروج من البيوت إلا للضرورة القصوى وعدم إتلاف أو تدميرأية مرافق عامة كانت أو خاصة

٢) عدم الإشتباك أو الإحتكاك مع أفراد الشرطة وتجنب العنف والمظاهرات بصفة عامة لأننا نتعامل مع بطش ليس له مثيل

٣) شراء إحتياجات تكفي لفترة طويلة مع التركيز على مستلزمات الأطفال وتخزين كميات كبيرة من المياه والشموع لإحتمال إنقطاع المياه والكهرباء عمداً ولفترات طويلة لإجبارالناس على الخروج من البيوت وتصيدهم في الشوارع

٤) من حق كل مواطن أن يدافع عن نفسه وأهله وبيته في حالة تعرضه في مسكنه لأية إقتحامات أو إنتهاكات غير قانونية

ياشعب مصر إن الدولة في حالة إنهيار شديد فيجب ألا نشتت أنفسنا بأمور جانبية أو ننساق خلف وعود كاذبة ولذلك نريد التكاتف وعرض كل الأفكارالبناءة وشرحها للناس ليعلموا أن حل المشاكل لن يكون بمنحة بأموال مزيفة ولا بإقالة العادلي وأمثاله ولابظهور الخبز فجأة ولفترة قصيرة ولا عن طريق الأحزاب الوهمية وإنما بداية التتغيير تكون بتطبيق وثيقة المستقبل والأمل فياشعب مصر «طبقوا وثيقة المستقبل والأمل»

لابد أن نتحرك وإعلموا أن ساعة العمل قد حانت
والسلام عليكم ورحمة الله وبركاته