الاثنين، 23 يونيو، 2008

التوابع

38 اتصال لم ارد عليهم .. انه صاحب المكتب الذى اعمل معه.. و لكنى اغلقت صوت الجرس لساعه واحده .. 38 اتصال؟؟؟؟

* أحمد تعالى المكتب دلوقتى

* حاضر يا بشمهندس انا جاى دلوقتى

صوته غير مريح و لكن لنرى ما المشكله .. و لكنى اعلم ما هى المشكله

* فين يا احمد المناقصه اللى كنت شغال فيها بقالك شهر و المفروض انك خلصتها و المفروض كنا نقدمها

* حضرتك عارف انها ضاعت فى الورق اللى خادوه من عربيتى فى امن الدوله... انا شغال فيها تانى ليل نهار بقالى اسبوعين

* و فين المستخلص اللى كنا المفروض نصرفه

* بعيد حساب الكميات تانى و بعيد الشغل تانى حضرتك عارف انهم ضيعوا ورق كتير بعد اما خلصته .. انا اسف

* بص يا احمد .. احنا اشتغلنا مع بعض قبل كده .. و طول عمرك كان شغلك كويس و ادارتك عاجبانى

لكن انا ماليش دعوه بمشاكلك مع الحكومه ... انا خسرت فلوس كتير قوى بسبب حواراتك دى و انت حتى كنت مش مركز فى الشغل قبل ما تتمسك

* بس شغلك خلصته برضه فى وقته ساعتها .. المشكله انهم مسكونى قبل ما اسلمه و ضيعوا كل حاجه بمنتهى الاستهتار ... و عامة انا بعيده تانى و شغال فيه بقالى اسبوع

* .. خلينا اصدقاء و علاقتنا احترام زى ما كانت من زمان .. و لما ييجى شغل تانى و تكون مشاكلك مع الحكومه خلصت هابقى اكلمك اكيد يا احمد

اخرج من عنده غير مصدق لما سمعت ... كنت دائما افخر بقدرتى على الاداره .. كنت افخر بأن اكثر من شركه ترغب فى ان اعمل فيها

هل تسرعت عندما قررت ترك الوظيفه و العمل لحسابى الخاص؟؟؟

ياللا

الرجل لم يخطىء .. انا بالفعل لم اكن اعمل بكامل طاقتى معه .. صحيح استطعت تعويض ذلك بتكثيف الشغل خلال ايام قلائل .. و لكن ما ذنب الرجل فى ضياع النتائج بسبب بعض الجهله ... ما ذنبه فى تلك الخساره الفادحه التى تكبدها بسبب بعض الظباط التافهين

عامة لا يزال هناك امل .. لا تزال اعمالى فى الشروق و العبور موجوده

صحيح ان طه اصبح لا يتصل كثيرا ليبلغنى بالنتائج .. و لكن ذلك بالتأكيد بسبب تحسن مستواه

فين ايام ما كان بيتصل كل خمس دقايق

الحمد لله .. الان اصبح يستطيع الاداره بدون مشاكل

تمر الايام و ابدا مره اخرى فى التركيز فى عملى .. لابد من زيادته و التركيز مره اخرى فى الفتره القادمه .. لابد من الاتفاق على بعض المشروعات الاخرى .. اظننى سمعت ان صاحب الشركه الوحيده التى اتعامل معها الان ينوى اخذ مناقصات جديده .. يمكننى ان اتفق معه على ادارتها بنسبه معقوله لن يرفضها

اتابع الاعمال و لكنى الاحظ شيئا غريبا

اصبح الجميع يتعامل مع على انى ضيفا فى عملى .. بل إن طه و ابراهيم اصبحوا يلقون السلام و يتكلمون معى بالكاد

تتوالى الايام و اسمع همسات و غمزات بين طه و ابراهيم و صاحب الشركه التى ادير له مواقعه و اعماله

يبدا الشك يزحف و ابدا فى السؤال

* راجل ما كلمكش فى حاجه يا طه؟؟

* حاجه زى ايه؟؟

* عن الشغل الجديد؟؟؟ عمارات العبور ... ماقالش هايبدأ امتى ؟؟؟ .دا كان اخر مره كلمنى كان بيقول انه مستعجل .. بس دلوقتى كل لما اشوفه الاقيه بينقطنى بالكلام

*مش عارف

اكرر نفس الشؤال مره اخرى على ابراهيم فيجيب اجابه لم افهم منها شىء .. و لكن من الواضح ان شيئا ما اكتمل نسجه فى الظلام ... شكلها بقى هنا و هناك

  • هو الراجل جاب حد يشيل الشغل يا طه
  • لأ .. احنا هانشتغل معاه
  • هو اتفق مع مين ... بقاله شهر بيهرب منى
  • اتفق معايا
  • معاك .. طب ماقولتليش ليه
  • اصله اتفق انى اشتغل فى شركته و يدينى مرتب كل شهر انا و ابراهيم
  • يعنى هاتسيب الشغل بتاعى و هاتروح معاه ... طب مش المفروض الراجل يفض الاتفاق اللى كان بينى و بينه الاول قبل ما يقرر كده
  • هو كام مكسوف يكلمك فى كده
  • بسم الله ما شاء الله يا طه ...بيت تعرف تتفق اهوه و تدير الشغل .. يا سلام بجد كنت بتمنى كده من زمان ... بس ما توقعتش انك اول ما تعرف تدير الليله يبقى تنطرنى
  • انا مش شايف فيها مشكله
  • لأ حاسب .. .فيه حاجه اسمها اصول .. فيه حاجه اسمها احترام ... فى اتفاقات رجاله ... تسمع عنها؟؟
  • انا اللى كنت واقف فى الشغل ...
  • انت كنت شغال معايا انا و انا كنت بعاملك كأنك شريك مش موظف ... انت شايف انك عملت حاجه صح؟؟؟
  • طبعا

لا اتذكر ماذا قلت له بعد ان قال انه مستريح الضمير بعد ان استولى على عملى بعد ان نسج خيوط المؤامره هو و صديقى الاخر.. لا اتذكر ماذا حدث فانا عندما افقد اعصابى لا ارى امامى

و لكن علمت فيما بعد انه اتقف مع صديقى الاخر على ان يعرضوا على المالك ان يتم تعيينهم عنده بمرتب

لا اعلم كيف نسوا الصداقه و كيف نسوا انى من تعبت فى تعليمهم بعد تخرجهم من الجامعه منذ شهور

لا اعلم كيف لم يشعروا بعذاب الضمير

لا اعلم مع اى مخلوقات اتعامل ... اهم بنى ادمين .. ام انا الذى كائن من كوكب اخر

يبدوا انى كنت مخطىء عندما تجاهلت نصائح المقربين بأن شغلى اولى من السياسه و اهم من اى حاجه

لا اعلم من الخطا و من الصواب ... لكن فيه رب اسمه كريم

هناك 3 تعليقات:

airprince يقول...

we lessa ha tshof men da kteeeer, ya 7ag da A.B.C fel sho3'l been el masryeen.. hona ana tefesht men showaya?

AhmeD 3abaS يقول...

5aleek zay manta, enta el sa7, we homa ely ghalat, we lazem te7afez we ne7afez kolena 3ala el a5la2 el sau, mesh net7awel zayohom

AhmeD 3abaS يقول...

5aleek zay manta, enta el sa7, we homa ely ghalat, we lazem te7afez we ne7afez kolena 3ala el a5la2 el sau, mesh net7awel zayohom