الخميس، 15 مايو، 2008

عن الحره اتحدث

حصل انهارده معايا موقف لذيذ عمال اضحك كل ما افتكره
من يومين اتصلت بيا قناة الحره و قالوا انهم بيعملوا موضوع عن الدور السياسى للفيس بوك فى الوطن العربى و هايكلموا شباب الكويت و الاردن و لبنان و مصر للحديث عن التجربه
طبعا ساعتها كان قفايا لسه وارم و قولت قشطه .. نحكى عن التجربه و نفضح ولاد الجزمه اللى بيقولوا اننا فى ازهى عصور الديمقراطيه و ييجوا يخطفونا من الشوارع و يعذبونا
المهم .. لبست القميص اللى على الحبل و بعد ما خلصت شغل روحت لمكان الاستوديو اللى قناة الحره متعاقده معاه للتصوير
هو فى عماره مش فاكر رقمها على الكورنيش جنب ماسبيرو فوق نظارات كارتييه .. و مش فاكر كان اسم الاستوديو ايه ايه تى سى او ايه جى سى تقريبا مش فاكر .. تقريبا الضرب بتاع امن الدوله زود الزهايمر عندى
دخلت الاستوديو .. و فجاه لقيت واحد طويل عريض المنكعين .. و بيكلمنى من بعيد ..* ازيك يا بشمهندس معاك طارق نصار مدير الاستوديو
-اهلا وسهلا
*مش عايزين شتيمه فى مصر
-و مين قال انى هاشتم فى مصر .. و مين يرضى اساسا بكده
*قصدى اى كلام عن الجكومه أو الأمن
-و هم دول مصر .. دول بعض الافراد اللى بيديروا مصر و هما اللى بيشوهوا صورتها بافعالهم
*انا قولتلك اى كلام عن الحكومه او الامن هاقطع الارسال
- طب سلاموا عليكم .. اكيد بعد اللى حصلى مش هاطلع و أقول ان كل حاجه فى مصر زى الفل و الحكومه بتحترم حقوق الانسان
* بلاش ننشر غسيلنا الوسخ
- طيب يا عم سلاموا عليكوا
* طب ثوانى
سابنى و مش و قعد يكلم حد فى التليفون .. انا قولت اكيد بيتصل بامن الدوله و هايسلمنى .. ياللا بقى .. هى علقه و لا اكتر
شويه كده و جه احد الفنيين و قاللى اتفضل قدام الكاميرا ... ماشى
قعدت قدام الكاميرا و حطيت السماعه فى ودنى و كنت سامع المذيع بيكلم حد من الكويت عن تجربة استخدام الفيس بوك فى الانتخابات البرلمانيه الكويتيه ... قعدت حوالى 20 دقيقه
* مساء الخير .. استاذ احمد؟؟ - ده المذيع بتاع الحره اللى على المايك
- اهلا وسهلا
* اهلا بيك .. سمعت من كام يوم على اللى حصلك
- اه .. دى كانت مجرد استضافه من امن الدوله على شويه ضرب علشان انا مش متربى و هم اكتشفوا ان ابويا نسى يربينى تقريبا .. و بالمره يعرفوا الباسوورد
* ههههههه على فكره مش ده سؤالى .. انا هاتكلم بصفه عامه احنا لسه ماسجلناش
- عادى مافيش مشاكل .. انا هاتكلم عن تجربة الفيس بوك بصفه عامه
ششششششششششششششششت ... إيىء
ده كان الصوت اللى سمعته فى السماعه و بعد كده سكوت تاااام
عدت ربع ساعه و محدش معبر اللى خلفونى.. و بالفعل بدات انام لغاية ما دخل احد الفنيين
* إحنا أسفين يا بشمهندز عطل فنى و هانصلحه على طول
- ...........
عدت ربع ساعه كمان و بدأت بالفعل أروح فى النوم و تقريبا بدأت أشخر لغاية ما الفنى اللى دخل من شويه صحانى من النوم .. الله يكرمه
* معلش يا بشمهندز الجهاز هنج و هانكلمك وقت تانى
- شكرا .. بس المكان عندكوا هادى و كويس جدا للنوم .كنت يا عم سيبنى شويه .. بصراحه الجو حر انهارده و التكييف عندكوا جميل.. سلاموا عليكم
و طبعا نازل و انا هاقع على الارض من كتر الضحك
و بعدها جالى اتصال من احد معدى قناة الحره بيعتذر و ان الاستوديو ده بالتعاقد مش تبع القناه نفسها و بيوعد بإكمال البرنامج فى يوم تانى فى استوديو غيره
شكرا شكرا
بس ما كنت اعرف ان السيطره الامنيه بالمنظر ده
على كل الفضاءيات المصريه .. و كمان الحره
مش قصدى ان الامن مسيطر على الحره زى ما هو مسيطر على دريم و المحور
قصدى انه برضه بيتحكم فى اللى يتقال و ما يتقالش و لو عن طريق املاء الاوامر للاستوديو مش القناه

شكرا





هناك 7 تعليقات:

nonoymm يقول...

السلام عليكم
طبعا واضح جدا انهم ادوك يعني معلش يعني صابونة معلش
وببعدين فيه ميثاق الاعلام دة خلى المواضيع شديدة شوية
حمد الله على سلامتك

سيبها على الله يقول...

اخى استاذ احمد ماهر
اولا ياسيدى الف مبروك انك خرجت سالما من ايد هؤلاء الحوش الهمج اللى فعلا اهلهم ماربهمش...وعموما ياعزيزى كله فى سبيل مصر يهون حتى لو قطعوا اعناقنا فسوف تخرج لهم اشباحنا تطاردهم وتطارد اهلهم اينما كانوا ..ياريتك تكتب لنا القصة كلها من طأطأ لسلام عليكوا حتى نكون مستعدون للموقف التاريخى وكيف نتعامل معهم يعنى مثلا مثلا هل يجب ابتلاع دستة بانجو علشان لو ضربونا مانحسش بالضرب ...صدقنى يابطل مشاهدة الصور التى عرضها وائل عباس جعلت الدم يغلى فى عروقى واحنا وهم والزمن طويل

إبراهيم عبد الغني يقول...

لا مش إملائات ولا حاجه
ده نظام إضرب المربوط ( اللى هو إنت :) ) يخاف السايب
القنوات دي عارفه إن أى لخبطه فى الكلام هاتتفسح و ده أكل عيش يا عم الحج و ناس بتسترزق و بيوت مفتوحه
و ده اللى عمل صيت للمدونات و مواقع زي الفيس بوك
اللى بيثق ف أى إعلام عربي يبقى متعلق ف الحبال الدايبه و ربنا عالم مين اللى بيتكلم بلسان الناس الحقيقي

إبراهيم عبد الغني يقول...

موضوع ذو صله
http://www.gadgetsarabia.com/2008/05/15/blogs-surpasses-newspapers/

airprince يقول...

law sama7t law 3andak wa2t 3ayez atkallem ma3ak, ana shab masry fe USA, please contact me meezzo@msn.com

إنسـان يقول...
أزال المؤلف هذا التعليق.
مـ~ـاجدولين يقول...

والله انت بطل قومي

لو في منك عشره كان ضبط حال الوطن العربي