الاثنين، 28 أبريل 2008

هانعمل ايه يوم 4 مايو

الإضراب السلمى مستمر

نجحنا فى ايصال رسالتنا
نجحنا فى التعبير عن راينا و ايصال صوتنا لصناع القرار
اكتر من 40% من المصريين استجابوا
و لولا الخوف و القهر كان ممكن يستجيب كل الشعب

احنا مش حزب سياسى
و لا نسعى للحكم
احنا اكبر تجمع مخلص لمصر على النت

كانت خطوتنا الاولى يوم 6 ابريل
كل مصر عرفت باليوم ده .. و اللى ماعرفش .. وزارة الداخليه مشكوره عرفته
هدفنا هو ايقاظ الشعب من الغيبوبه و كيفية المطالبه بحقوقه البسيطه .. هدفنا نشر الإيجابيه بعد سنوات طويله من الخوف و الرعب .. وطبعا كلنا عارفين إن يوم 6 ابريل كل الناس فى الشارع كان نفسها تعبر عن رأيها و تقول اتخنقنا .. بس الإرهاب اللى حصل من الامن المركزى و الحشود الرهيبه خوفوا ناس كتير و خلى كل الناس مش عارفين يتجمعوا فى مكان واحد
بعد 6 ابريل ناس كتير بدأت تتكلم ..و بعد 4 مايو ناس أكتر هاتتكلم .. خلاص العجله دارت و محدش هايقدر يوقفها و المارد بدأ يصحى
و بعد 6 ابريل بقينا نسمع من الحكومه كلام عن وقف ارتفاع الاسعار و حد ادنى للأجور .. بس كلام ..و إحنا بس اللى ممكن نجبرهم ينفذوه

مطالبنا بسيطه جدا
1- حد ادنى للاجور لكل فئه مع ربط الاجور بالاسعار كما تفعل أى دوله تعانى من الغلاء ...
2- إجراءات فوريه و صارمه و إصدار تشريعات و قوانين يتم تطبيقها على الجميع لمكافحة الغلاء و التحكم فى السوق و منع الإحتكار ..
3- الافراج عن معتقلى يوم 6 ابريل

و المطالب دى ممكن الحكومه تحلها بكل سهوله .. بس الأهم النيه مش مجرد تصريحات .. و فيه حلول كتير لزيادة الموارد زى الضرائب التصاعديه و التفعيل الحقيقى لرقابة الدوله و حماية المستهلك و تطبيق القوانين على الكل .. مش الغلابه بس
فيه عشرات الحلول اللى الناس المخلصين بيطالبوا بيها من زمان .. بس لازم حد يجبر صناع القرار فى مصر على التطبيق .. عمرهم ما هيدونا حقوقنا ولا هايحسوا بينا من نفسهم

طب هانعمل ايه يوم 4 مايو؟؟
كل واحد يعمل اللى يقدر عليه من الإختيارات التاليه

1- الاجماع على ارتداء ملابس سوداء و يفضل مطبوع عليها مطالبنا المحدده المذكوره بأعلى هذه الصفحه .. و لو مش عارف يبقى اى حاجه سوده .. و خلاص .. شريط .. شاره .. بندانا

2- تم الاتفاق على ان يحاول الجميع قدر استطاعته بكل السبل البقاء فى المنزل فى يوم الإضراب مع تعليق لافته على باب منزله بمطالبنا المشروعه

3- الاجماع على تعليق علم مصر فى البلكونات و رايات سوداء و اى لوحات او لافتات تتضمن مطالبنا البسيطه

4- للطلاب و الاطباء و المهن الحرجه التى قد تضره دعوة البقاء فى البيت ... يمكنك أن تذهب لعملك او جامعتك او مدرستك عادى جدا مع الحرص على ارتداء اى شىء اسود او شاره سوده و ياريت تعرف تكتب بأى طريقه مطالبنا على اللبس او الشاره اللى هاتعلقها على شنطتك او دراعك ..و يستحسن تعرف تتجمع مع الناس جوه جامعتك او شغلك و تعلنوا الاعتصام الرمزى لبعض الوقت إعتراضا على الاحوال السيئه التى تمر بها مصر مع اعلان مطالبنا بوضوح

5- مقاطعة شراء اى سلع فى اليوم ده تحديدا .. و مقاطعة اللحوم و الفارخ لمدة 3 ايام هى 4 و 5 و 6 مايو .. و ماتخافوش ..محدش هايموت

6- مقاطعة الجرائد الحكوميه المضلله و الكاذبه زى الاهرام و الاخبار و الجمهوريه و روز اليوسف ... و كذلك مقاطعة الفضائيات الغير محايده و التى تستجيب للضغوط و تذيع النشرات و الاخبار القادمه من أمن الدوله و خاصة برامج 90 دقيقه و القاهره اليوم

7- نظرا لإستخدام حكومة الحزب الوطنى لقانون التجمهر الذى تم اصداره عام 1914 و الذى يجرم اى تجمع 5 افراد " فى الشارع "بدون اذن مسبق .. فإننا نطالب جميع اعضاء الجروب و المتعاطفين بالوقوف أمام منازلهم لكل أو لبعض الوقت يوم 4 مايو المقبل مرتدين السواد و حاملين للافتات بها مطالبنا مع فتح حوارات نقاشيه مع الماره و الجيران و إن لم تستطع فممكن تقف فى البلكونه مع نشر حاجه سوده و كتابة مطالبنا و إن لم تستطع فممكن تقف على سطح البيت .. .. اتصرف
ملحوظه - هذه النقطه قابله للتعديل يا ريت تراجع تانى قبل يوم 4 مايو

على جميع الاعضاء و المتعاطفين استعادة حماس و مجهود ما قبل 6 ابريل و العمل الجاد منذ اليوم حتى يوم الاضراب القادم على نشر كل تلك الافكار بين الشعب المصرى و هم اهلنا و اصحابنا و اقاربنا و زملائنا فى العمل مستخدمين فى ذلك كل الوسائل المشروعه من دعوات صريحه عامه او فرديه او ارسال رسائل محمول لقوائمنا على التليفون او إرسال رسائل للشريط المتحرك فى الفضائيات بجميع انواعها او مكالمات هاتفيه او البريد الالكترونى لكل القوائم و المجموعات البريديه و المنتديات و المدونات و المواقع الاعلانيه و الجرائد و الصحف و المجلات و الاتصال بالفضائيات .. و كذلك تعليق الالافتات و ارتداء تى شيرت أو شاره يحمل الدعوه للإحتجاج السلمى من الان حتى ميعاد 4 مايو بجانب لصق دعوات الاحتجاج السلمى فى الشوارع و امام المساجد و داخل الجامعات و توزيع البيانات فى الشوارع و استخدام كل الوسائل المتاحه منها فكرة الاسبراى و استامبات الخشب و... و... و....
و على طلاب الجامعه نشر كل تلك الافكار بين اصدقائهم و زملائهم و محاولة النشر بكل الوسائل السلميه شارحين اهمية اليوم و كيف انه الخطوه الثانيه و موضحين مكاسب 6 ابريل
مهمتنا هى النشر فى الشارع و نقل ثقافة الايجابيه لرجل الشارع البسيط
الناس اللى ماعندهمش نت ولا عندهم وصلة دش .. ولا بيقروا جرايد من الاساس

و على المصريين المقيمين بالخارج التحضير لوقفات إحتجاجيه صامته امام مقرات السفاره المصريه .. بجد هاتفرق معانا كتير

ندعوا جموع المهندسين المظلومين لترتيب وقفه احتجاجيه يوم 4 مايو بالمقر الرئيسى للنقابه للمطالبه بفك الحراسه عن النقابه و اجراء انتخابات
و كذلك ندعوا الاطباء لتنظيم وقفه احتجاجيه يوم 4 مايو للمطالبه بكادر خاص
و ندعوا الصحفيين لتنظيم وقفه احتجاجيه اعتراضا على محاكمة الصحفيين و رؤساء التحرير و اغلاق بعض الصحف
و نوجه الدعوه لاى عمال يعانون من مشكلات مع ادارة المصنع .للقيام بوقفه احتجاجيه لمدة نصف ساعه للمطالبه بحقوقهم
كله داخل مكانه .. من غير تجمهر ولا فوضى ولا تعطيل مرور

لينك الجروب على الفيس بوك
http://www.facebook.com/group.php?gid=9973986703



الجمعة، 11 أبريل 2008

صور يوم 6 ابريل







يوم 6 ابريل الساعه 10 صباحا






قوات الاحتلال





من نجا من الاعتقال فى ذلك اليوم و توجه لقفص لنقابة المحامين



الناس واقفه بتتفرج بإهتمام و نفسهم يعملوا حاجه



الناس عماله تزيد




و فجاه تنطلق الشراره
الجماهير بتهتف لوحدها .... إحنا الشعب


و تبدا القوات فى المحاصره

اجرى يا جدع

اعتقال لبعض المواطنين الابرياء




و الناس تتجمع تانى



الست دى من الناس .. و فجاه قعدت تتكلم مع الناس و تصرخ ... انتوا واقفين تتفرجوا؟؟؟؟


القوات تتقدم ... و يتكرر السيناريو


بيان جروب الفيس بوك بشأن أحداث العنف في المحلة الكبرى

بيان بشأن أحداث العنف في المحلة الكبرى

نحن مجموعة Group "اضراب عام لشعب مصر – 6 April " المنشأة علي موقع الفيسبوك و موقعها
www.facebook.com/group. php?gid =9973986703
و التي يبلغ عدد أعضائها ما يقرب من 70000 عضو، و التي هي عبارة عن تجمع لكل من هو مقتنع بضرورة إيصال أصواتنا لصناع القرار بكافة الوسائل السلميه المشروعه .. نعلن رفضنا التام لأي أحداث عنف شهدتها البلاد مؤخرا و عن نبذها للعنف بجميع أشكاله و صوره.

فنحن ندين و بشدة أعمال العنف التي شهدتها مدينة المحلة الكبرى يومي السادس و السابع من أبريل عام 2008 و نطالب بمعاقبة من تسبب فى دفع الجماهير الغاضبه لإستخدام العنف
و نحن نؤكد علي أن العنف ليس وسيلة مشروعة للتعبير عن الرأي، و أن هناك العديد من الوسائل السلمية المشروعة التي يحق لأي مواطن استخدامها للتعبير عن رأيه أو عن غضبه. كتلك الوسائل التي نادينا بها مثل الجلوس بالمنزل، و مقاطعة شراء أي سلعة، و ارتداء الألوان السوداء، و رفع العلم المصري في الشرفات، و محاولة الإضراب عن العمل لمن لا يضر إضرابه عن العمل مصالح الدولة، أو التظاهر السلمي.

كما ندين و بشدة قمع الأمن المصري للمتظاهرين في مدينة المحلة الكبرى و الذي كان بداية لولادة شرارة العنف لدي بعض المتظاهرين. و هو ما أدي إلي حدوث مواجهات لا تتوافق مع ما نتمناه للمصلحة العامة.

كما نود أن نؤكد علي أن مطالبنا شرعية و تهدف إلي صالح المواطن المصري البسيط و هي:
1- حد أدنى للأجور لكل الفئات و الوظائف و ربط الأجور بالأسعار كما يحدث فى جميع الدول التي تعانى من الغلاء
2- إجراءات حقيقية لوقف ارتفاع الأسعار و منع الاحتكار
كما نطالب بالإفراج الفوري عن جميع المعتلقين علي خلفية أحداث السادس من أبريل من عام 2008، إعمالا للدستور والمواثيق الدولية المعنية بحقوق الإنسان ، والتي تكفل الحق في التظاهر السلمي وحرية الرأي والتعبير.

مجموعة Group "اضراب عام لشعب مصر – 6 April"

الجمعة، 4 أبريل 2008

شاهد تسجيل حلقة برنامج على الهوا مع جمال عنايت على شبكة الاوربت

اقوى نقاش عن جروب اضراب 6 ابريل على الفيس بوك حتى الان
لقاء مع مؤسسى الجروب و عضو الحزب الوطنى رئيس اللجنه التشريعيه بمجلس الشعب
هذا الجروب هو اقوى من اى فصيل سياسى فى مصر
تجمع عظيم من شباب لا مصالح شخصيه تحركهم
لا هدف لهم إلا اصلاح و انقاذ مصر

لينك الجزء الاول و المقدمه
http://www.youtube.com/watch?v=5hKfk1MIYBw

لينك الجزء الثانى و فيه المقلب اللى كنا هانقع فيه
http://www.youtube.com/watch?v=L2oIehOwT7g

لينك الجزء الثالث
http://www.youtube.com/watch?v=ZQ6gx6HDyAk

الجزء الرابع الساخن
http://www.youtube.com/watch?v=8Xsk8st8tuI
كنا محضرين كلام كتييير
و للاسف خلص الوقت
فيه مذيعين ماينفعش معاهم الديمقراطيه

كان نفسى اتكلم براحتى
الوقت كان قليل

اكن نفسى اخبط براحتى
للأسف مافشتش غليلى

لينك الجزء الثانى فيه المقلب اللى كنا هانقع فيه


عمر هريدى حب يستغلنا لصالح الجزب الوطنى
فاكرنا زباين
المشكله ان كلامه و ردوده غير مقنعه بالمره و لما يتزنق مش بيعرف يرد
و ده هايبان فى الجزء الثالث


فى الجزء الثالث هرشنا المقلب و التدبيسه
و بدأنا نزنق بتاع الحزب الوطنى
لكن جمال عنايت كان بيلغوش و يقاطع و بينقذ عمر هريدى عضو الحزب الوطنى و امين اللجنه التشريعيه بالحزب الوطنى
لو كنا فى العاشره مساء او لو كان فيه وقت كنا فرمناه
كان فيه نقط كتير كاتبها فى الورقه و لو كنت قولتها كنت بهدلته بس الوقت

المذيع عايز يقول اننا ماعندناش حلول
احنا حاولنا ناكد إن الحلول موجوده من سنين و الناس صوتها اتنبح
لكن الحزب الوطنى مصالحه غير مصالح الشعب
المذيع كان بيسأل اسئله متخصصه
و احنا حاولنا نرد عليه قدر الامكان
ممكن يكون الاداء مش جامد بسبب الاتفاق على عدم التصعيد و اننا اتاخدنا على خوانه
و كمان موضوع الوقت
انا كنت كاتب حاجات كتيييير مالحقتش اقول ربعها

شوفتوا لما قدمناله حل فصل الانتاج عن التوزيع و ماعرفش يرد
لما الدعم يتوجه للرغيف مش للدقيق ده حل موجود فى دول كتير جدا من زمان

الجزء الرابع ساخن جدا و لو كنا طولنا كنا هانبهدل الراجل
كنا محضرين كلام كتييير
و للاسف خلص الوقت