الأحد، 30 مارس، 2008

و ماذا بعد 6 ابريل

سؤال هام جدا لابد من الإجابه عليه
هانعمل ايه بعد يوم 6 ابريل
الكل متوقع ان يوم 6 ابريل ده يبقى يوم مهم جدا و فيه احداث كتير
على الاقل هانعمل قلق جامد
و الناس اللى ماعرفتش هاتعرف اليوم ده
و الفكره هاتكبر
لإن فيه ناس هتتظاهر
و ناس هاتعتصم
و ناس هاتضرب عن العمل و الدراسه
و ناس بافعل ناويه لو راحوا الشغل او الجامعه هايعلنوا اضرابهم لساعات و منهم اللى هايعمل اعتصام و مظاهرات
و فيه طلبه ابتدوا يعلنوا عن الاضراب فى الجامعه من دلوقتى
و فيه مظاهرات هاتكون فى الجامعه كمان
دا غير الاضراب عن الشراء
و ده انا شايفه نشاط مهم جدا
لإن فيه ناس بتخاف من المظاهرات و مضطره تروح الشغل و لو راحت هاتخاف تتكلم
طبعا انا ضد الخوف و شايفه انه السبب الرئيسى لتدمير مصر
لكن لو حد ... بلاش نقول خايف .... خليها مش هايقدر يشارك فى المظاهرات او الاضراب يبقى يشارك فى الإضراب عن الشراء
و طبعا كلنا متفقين عن الشاره او التيشيرت و تعليق علم مصر اليوم ده

و طبعا نعمل اللى علينا و ننشر الفكره للناس اللى مش بتدخل على النت بكل الطرق
و ندعى ربنا انه يوفقنا و ينصرنا على الظلمه

طيب ..... هل يوم واحد كفايه
بالطبع بأ
حتى لو نجح
لازم يستمر
و حالة الإيجابيه تنتقل للناس
اصل الثوره دى بتبقى عدوى ... او زى الشراره فى القش ... شوفوا التاريخ بيقول ايه

المهم
عندنا يوم 7 ابريل و 8 ابريل انتخابات المحليات
الحكومه هاتكون مشغوله بالتزوير كالعاده
يبقى الحل نكمل الإضراب .. و نستمر
و ننشر الفكره
و نعمل اعتصامات بجد بقى
اعتصامات مش مظاهرات
حاجه تسمع اعلاميا
و كله بالادب
لا هانشتم حد ولا نزعل حد

طبعا احنا مش مغسلين و ضامنين جنه زى المثل ما بيقول
بس اكيد كلنا هانبذل كل طاقتنا و ننشر الفكره
و نخليها تستمر بعد 6 ابريل
و تكبر و تكبر
لغاية ما نحقق كل هدفنا و نجبر الحكومه انها تلتزم و تطبق الحلول
و على فكره فيه حلول لكل مشاكل مصر
و فيه علماء و مفكرين صوتهم اتنبح من سنين
بس الحلول تتعارض مع مصالح رجال الاعمال اللى بيحكمونا
حلول مشاكلنا تتعارض مع مصالح الحراميه اللى بيحكموا مصر
لازم نجبرهم يطبقوا الحلول

و على فكره
حتى لو لا قدر الله مانجحناش المره دى
ماتنسوش ان دلوقتى جروبنا بقى اكبر من اى حزب فى مصر

يا ريت تفكروا معايا و ماذا بعد 6 ابريل
ghosty

انضم لأقوى جروب مصرى على الفيس بوك
اضراب 6 ابريل
http://www.facebook.com/group.php?gid=9973986703

هناك تعليق واحد:

nonoymm يقول...

ربنا يسهلها ويكرمنا يارب
متفائلة خير واتمنى فعلا تؤتي ثمارها
بوركتت اخي